സോഷ്യൽ മീഡിയയിൽ പുതിയ ഭക്ഷണ ട്രെൻഡുകൾ വൈറലാകുന്നതിനിടെ ആരോഗ്യവിദഗ്ധരുടെ ആശങ്കയേറ്റി വെണ്ണ കടിച്ചുതിന്നുന്ന വിചിത്രമായ ശീലം. ചോക്ലേറ്റ് ബാറുകൾ കഴിക്കുന്നതുപോലെ വെണ്ണയുടെ കട്ടകൾ നേരിട്ട് കടിച്ചുകഴിക്കുന്ന വീഡിയോകളാണ് ടിക് ടോക്കിലും ഇൻസ്റ്റഗ്രാമിലും ശ്രദ്ധ നേടുന്നത്.
സാധാരണയായി ബ്രെഡിൽ പുരട്ടാനോ ഭക്ഷണത്തിൽ ചേർക്കാനോ ഉപയോഗിക്കുന്ന വെണ്ണയെ പ്രധാന ലഘുഭക്ഷണമായി അവതരിപ്പിക്കുന്നതാണ് ഈ ട്രെൻഡിന്റെ പ്രത്യേകത. ചിലർ വെണ്ണ കട്ടകളായി കഴിക്കുമ്പോൾ മറ്റുചിലർ അതിനൊപ്പം ചോക്ലേറ്റ് മൗസ്, ഫ്രോസ്റ്റിംഗ്, പാസ്ത സോസുകൾ എന്നിവയും ചേർക്കുന്നുണ്ട്. വെണ്ണയിൽ മുക്കിയ ഐസ്ക്രീമും സോഷ്യൽ മീഡിയയിൽ ചർച്ചയാകുന്നുണ്ട്.
എന്നാൽ കാഴ്ചയിൽ കൗതുകം തോന്നുന്ന ഈ ഭക്ഷണശീലം ആരോഗ്യത്തിന് ദോഷകരമായേക്കാമെന്നാണ് വിദഗ്ധരുടെ മുന്നറിയിപ്പ്. വെണ്ണയിൽ പൂരിത കൊഴുപ്പ് ഉയർന്ന അളവിൽ അടങ്ങിയിട്ടുണ്ട്. അമിതമായി പൂരിത കൊഴുപ്പ് കഴിക്കുന്നത് രക്തത്തിലെ എൽ.ഡി.എൽ കൊളസ്ട്രോൾ വർധിപ്പിക്കാനും ഹൃദ്രോഗ സാധ്യത ഉയർത്താനും ഇടയാക്കും.
അമേരിക്കൻ ഹാർട്ട് അസോസിയേഷൻ ദിവസേന ലഭിക്കുന്ന ആകെ കലോറിയുടെ ആറ് ശതമാനത്തിൽ താഴെ മാത്രമായി പൂരിത കൊഴുപ്പിന്റെ ഉപയോഗം പരിമിതപ്പെടുത്താനാണ് ശുപാർശ ചെയ്യുന്നത്.
സോഷ്യൽ മീഡിയയിൽ വൈറലാകുന്ന ഭക്ഷണരീതികൾ ആരോഗ്യത്തിന് അനുയോജ്യമാണെന്ന് കരുതി അനുകരിക്കരുത്. വെണ്ണ മിതമായ അളവിൽ ഭക്ഷണത്തിന്റെ ഭാഗമായി ഉപയോഗിക്കുന്നതാണ് ഉചിതം. അമിതമായി വെണ്ണ നേരിട്ട് കഴിക്കുന്നത് ഒഴിവാക്കണമെന്നും ആരോഗ്യകരമായ ഭക്ഷണശീലങ്ങൾക്ക് പ്രാധാന്യം നൽകണമെന്നും വിദഗ്ധർ ഓർമ്മിപ്പിക്കുന്നു.
