തിരുവനന്തപുരം: ഭക്ഷണം പൊതിയാനും ബേക്ക് ചെയ്യാനും ഗ്രിൽ ചെയ്യാനും വ്യാപകമായി ഉപയോഗിക്കുന്നതാണ് അലുമിനിയം ഫോയിൽ. എന്നാൽ അലുമിനിയം ഫോയിൽ ഉപയോഗിക്കുന്നത് കാൻസറിന് കാരണമാകുമോ എന്ന ആശങ്ക പലർക്കുമുണ്ട്. സാധാരണ വീട്ടാവശ്യങ്ങൾക്ക് അലുമിനിയം ഫോയിൽ ഉപയോഗിക്കുന്നത് കാൻസറിന് കാരണമാകുമെന്ന് തെളിയിക്കുന്ന ശാസ്ത്രീയ തെളിവുകൾ നിലവിലില്ല. എന്നാൽ ഫോയിൽ എങ്ങനെ ഉപയോഗിക്കുന്നു എന്നത് പ്രധാനമാണ്.
അമ്ലഗുണമുള്ളതോ ഉപ്പ് കൂടുതലുള്ളതോ ആയ ഭക്ഷണവുമായി അലുമിനിയം ഫോയിൽ നേരിട്ട് സമ്പർക്കത്തിൽ വരുമ്പോൾ, പ്രത്യേകിച്ച് ഉയർന്ന താപനിലയിൽ പാചകം ചെയ്യുമ്പോൾ, ചെറിയ അളവിൽ അലുമിനിയം ഭക്ഷണത്തിലേക്ക് കലരാൻ സാധ്യതയുണ്ട്. തക്കാളി, നാരങ്ങ, പുളി, വിനാഗിരി തുടങ്ങിയ ചേരുവകൾ അടങ്ങിയ ഭക്ഷണങ്ങൾ ഫോയിൽ ഉപയോഗിച്ച് ദീർഘനേരം സൂക്ഷിക്കുമ്പോൾ കൂടുതൽ ശ്രദ്ധ വേണം.
ചൂടുള്ളതും അമ്ലഗുണമുള്ളതുമായ ഭക്ഷണം നേരിട്ട് ഫോയിലിൽ പൊതിയുന്നതും ഒഴിവാക്കുന്നതാണ് നല്ലത്. ഉദാഹരണത്തിന്, നാരങ്ങ ചേർത്ത് മത്സ്യം ബേക്ക് ചെയ്യുമ്പോൾ ഫോയിൽ ഭക്ഷണവുമായി നേരിട്ട് സമ്പർക്കത്തിൽ വരാതിരിക്കാൻ പാർച്ച്മെന്റ് പേപ്പർ ഉപയോഗിക്കാം. അതുപോലെ തക്കാളി ചേർത്ത കറികൾ, അച്ചാറുകൾ, വിനാഗിരി കൂടുതലുള്ള ഭക്ഷണങ്ങൾ എന്നിവ ഫോയിലിൽ ദീർഘനേരം സൂക്ഷിക്കാതിരിക്കുന്നതാണ് സുരക്ഷിതം.
ബാക്കി വന്ന ഭക്ഷണം സൂക്ഷിക്കാൻ ഗ്ലാസ്, സെറാമിക് തുടങ്ങിയ പാത്രങ്ങൾ ഉപയോഗിക്കാം. കേടുവന്നതോ കീറിയതോ കൂടുതൽ ചുളിവുകളുള്ളതോ ആയ ഫോയിൽ ആവർത്തിച്ച് ഉപയോഗിക്കുന്നതും ഒഴിവാക്കണം. ഭക്ഷണം ഫോയിലിൽ പൊതിയുമ്പോൾ ദീർഘനേരം സൂക്ഷിക്കാതെ കുറച്ച് സമയത്തേക്ക് മാത്രം ഉപയോഗിക്കുന്നതാണ് ഉചിതം.
അലുമിനിയം ഫോയിൽ മൈക്രോവേവിൽ ഉപയോഗിക്കരുത്. ലോഹമായതിനാൽ ഫോയിൽ സ്പാർക്ക് ഉണ്ടാക്കാനും മൈക്രോവേവിന് കേടുപാടുകൾ സംഭവിക്കാനും തീപിടിത്തത്തിനും സാധ്യതയുണ്ട്.
അതിനാൽ, സാധാരണ രീതിയിൽ അലുമിനിയം ഫോയിൽ ഉപയോഗിക്കുന്നതുകൊണ്ട് കാൻസർ ഉണ്ടാകുമെന്ന് പറയാനാകില്ല. എന്നാൽ അമ്ലഗുണമുള്ളതും ഉപ്പ് കൂടുതലുള്ളതുമായ ഭക്ഷണങ്ങൾ ഉയർന്ന ചൂടിൽ ഫോയിലുമായി നേരിട്ട് സമ്പർക്കത്തിൽ വരുന്നത് പരമാവധി കുറയ്ക്കുന്നത് ഭക്ഷ്യസുരക്ഷയുടെ ഭാഗമായുള്ള നല്ല ശീലമാണ്.
