പ്രമേഹമുള്ളവർ കാലുകളുടെ പരിചരണത്തിൽ പ്രത്യേക ശ്രദ്ധ നൽകേണ്ടത് അത്യാവശ്യമാണ്. പ്രമേഹം കാലുകളിലെ ഞരമ്പുകളെയും രക്തയോട്ടത്തെയും ബാധിക്കാൻ സാധ്യതയുള്ളതിനാൽ ചെറിയ മുറിവോ പൊട്ടലോ പോലും ചില സാഹചര്യങ്ങളിൽ ഗുരുതരമായ അണുബാധയ്ക്കും കാലിലെ അൾസറിനും കാരണമാകാം. അതിനാൽ സാധാരണ സൗന്ദര്യപരിചരണമായ പെഡിക്യൂറിന് പകരം സുരക്ഷിതമായ ഫുട് കെയറിനാണ് പ്രാധാന്യം നൽകേണ്ടത്.
എന്താണ് ഡയബറ്റിക് പെഡിക്യൂർ?
പ്രമേഹമുള്ളവരുടെ കാലുകളുടെ പ്രത്യേക ആവശ്യങ്ങൾ പരിഗണിച്ച് സുരക്ഷിതമായി നടത്തുന്ന നഖങ്ങളുടെയും പാദങ്ങളുടെയും പരിചരണമാണ് ഡയബറ്റിക് പെഡിക്യൂർ. കാലുകളുടെ ഭംഗി മാത്രമല്ല, മുറിവുകൾ, അണുബാധ, നഖത്തിലെ മാറ്റങ്ങൾ തുടങ്ങിയവ നേരത്തെ കണ്ടെത്തുന്നതിനും ഇതിലൂടെ ശ്രദ്ധ നൽകുന്നു.
പ്രമേഹം മൂലം ഉണ്ടാകാവുന്ന ഡയബറ്റിക് ന്യൂറോപ്പതി കാരണം കാലിലെ വേദന, ചൂട്, തണുപ്പ് തുടങ്ങിയവ തിരിച്ചറിയാനുള്ള കഴിവ് കുറയാം. അതിനാൽ കാലിൽ മുറിവുണ്ടായാലും ചിലർക്ക് അത് ശ്രദ്ധയിൽപ്പെടണമെന്നില്ല. രക്തയോട്ടം കുറയുന്ന സാഹചര്യത്തിൽ മുറിവുകൾ സുഖപ്പെടാനും കൂടുതൽ സമയം വേണ്ടിവന്നേക്കാം.
നഖം മുറിക്കുമ്പോൾ ശ്രദ്ധിക്കണം
പ്രമേഹമുള്ളവർ നഖം നേരെ മുറിക്കുന്നതാണ് സുരക്ഷിതമായ രീതി. നഖത്തിന്റെ കോണുകളിലേക്ക് ആഴത്തിൽ ക്ലിപ്പറോ കത്രികയോ ഉപയോഗിക്കുന്നത് ഒഴിവാക്കണം. മുറിച്ച ശേഷം മൂർച്ചയുള്ള അരികുകൾ നെയിൽ ഫയൽ ഉപയോഗിച്ച് സാവധാനം മിനുക്കാം.
നഖം വളരെ കട്ടിയുള്ളതോ മഞ്ഞനിറമുള്ളതോ ആണെങ്കിൽ, നഖം ചർമത്തിലേക്ക് വളർന്നുകയറുകയാണെങ്കിൽ സ്വയം മുറിക്കാൻ ശ്രമിക്കാതെ ഡോക്ടറുടെയോ ഫുട് കെയർ വിദഗ്ധന്റെയോ സഹായം തേടുന്നതാണ് നല്ലത്.
കാലിലെ കോൾസും കട്ടിയുള്ള ചർമവും സ്വയം നീക്കം ചെയ്യരുത്. ബ്ലേഡ്, കത്തി, ഫുട് റേസർ തുടങ്ങിയവ ഉപയോഗിക്കുന്നത് മുറിവുണ്ടാകാനും അണുബാധയ്ക്കും കാരണമാകാം.
പെഡിക്യൂറിന് മുമ്പ് കാലുകൾ പരിശോധിക്കണം
പെഡിക്യൂർ ചെയ്യുന്നതിന് മുമ്പ് കാലുകളിൽ താഴെ പറയുന്ന മാറ്റങ്ങളുണ്ടോ എന്ന് പരിശോധിക്കണം:
- ചെറിയ മുറിവുകൾ
- ചുവപ്പ് അല്ലെങ്കിൽ വീക്കം
- ചർമ്മത്തിലെ പൊട്ടലുകൾ
- വെള്ളപ്പൊട്ടുകൾ
- രക്തസ്രാവം
- വേദന അല്ലെങ്കിൽ മരവിപ്പ്
- കത്തുന്നതുപോലുള്ള അനുഭവം
- നഖത്തിന്റെ നിറത്തിലോ രൂപത്തിലോ മാറ്റം
- ഫംഗൽ ഇൻഫെക്ഷന്റെ ലക്ഷണങ്ങൾ
- നഖം ചർമത്തിലേക്ക് വളർന്നുകയറുന്നത്
ഇത്തരം ലക്ഷണങ്ങൾ ഉണ്ടെങ്കിൽ സാധാരണ സലൂൺ പെഡിക്യൂർ ചെയ്യുന്നതിന് മുമ്പ് ഡോക്ടറുടെ നിർദേശം തേടണം. തുറന്ന മുറിവ്, അൾസർ, അണുബാധ, ചുവപ്പ്, വീക്കം എന്നിവയുള്ളപ്പോൾ പെഡിക്യൂർ ഒഴിവാക്കുന്നതാണ് സുരക്ഷിതം.
സലൂണിൽ പെഡിക്യൂർ ചെയ്യുമ്പോൾ
വ്യക്തിഗത നെയിൽ ക്ലിപ്പർ, ഫയൽ തുടങ്ങിയ ഉപകരണങ്ങൾ സ്വന്തമായി ഉപയോഗിക്കുന്നത് അണുബാധയുടെ സാധ്യത കുറയ്ക്കാൻ സഹായിക്കും. സലൂണിലെ ഉപകരണങ്ങൾ ഓരോ ഉപയോഗത്തിനും ശേഷം കൃത്യമായി അണുവിമുക്തമാക്കുന്നുണ്ടെന്ന് ഉറപ്പാക്കണം. ഫുട് ബാത്തും ഓരോ ഉപഭോക്താവിനും ശേഷം വൃത്തിയാക്കണം.
ബ്ലേഡ് ഉപയോഗിച്ച് ചർമം നീക്കം ചെയ്യുന്നതും ശക്തമായി സ്ക്രബ് ചെയ്യുന്നതും ഒഴിവാക്കണം. ക്യൂട്ടിക്കിൾ മുറിക്കുന്നതും ഒഴിവാക്കുന്നതാണ് സുരക്ഷിതം, കാരണം ഇത് അണുബാധയ്ക്കുള്ള സാധ്യത വർധിപ്പിക്കാം.
ചൂടുവെള്ളവും മോയ്സ്ചറൈസറും ശ്രദ്ധിച്ച്
കാലിൽ ചൂട് തിരിച്ചറിയാനുള്ള കഴിവ് കുറഞ്ഞിട്ടുണ്ടെങ്കിൽ വളരെ ചൂടുള്ള വെള്ളം പൊള്ളലിന് കാരണമാകാം. അതിനാൽ കാലുകൾ കഴുകാൻ ഇളംചൂടുള്ള വെള്ളം ഉപയോഗിക്കുകയും ശേഷം പ്രത്യേകിച്ച് വിരലുകൾക്കിടയിൽ നന്നായി ഉണക്കുകയും വേണം.
വരണ്ട ചർമ്മം പൊട്ടുന്നത് തടയാൻ ആവശ്യത്തിന് മോയ്സ്ചറൈസർ ഉപയോഗിക്കാം. എന്നാൽ വിരലുകൾക്കിടയിൽ മോയ്സ്ചറൈസർ പുരട്ടുന്നത് ഒഴിവാക്കുന്നതാണ് നല്ലത്, കാരണം അധിക ഈർപ്പം ഫംഗൽ പ്രശ്നങ്ങൾക്ക് അനുകൂല സാഹചര്യം സൃഷ്ടിച്ചേക്കാം.
പ്രമേഹമുള്ളവർ ദിവസവും കാലുകൾ പരിശോധിക്കുകയും അസാധാരണമായ മുറിവോ നിറവ്യത്യാസമോ വീക്കമോ വേദനയോ ശ്രദ്ധയിൽപ്പെട്ടാൽ വൈകാതെ ആരോഗ്യവിദഗ്ധരുടെ സഹായം തേടുകയും ചെയ്യുന്നത് പ്രധാനമാണ്.
