രാത്രിയിൽ ഉറങ്ങുന്നതിനിടെ പെട്ടെന്ന് കാലിലെ പേശികൾ മുറുകുകയും ശക്തമായ വേദന അനുഭവപ്പെടുകയും ചെയ്യുന്ന അവസ്ഥ പലരെയും അലട്ടാറുണ്ട്. ഏതാനും സെക്കൻഡുകൾ മുതൽ മിനിറ്റുകൾ വരെ നീണ്ടുനിൽക്കുന്ന ഇത്തരം പേശിവലിവ് ഉറക്കം തടസ്സപ്പെടുത്തുകയും ചിലപ്പോൾ കാലനക്കാൻ പോലും ബുദ്ധിമുട്ടുണ്ടാക്കുകയും ചെയ്യാം.
ശരീരത്തിൽ ആവശ്യത്തിന് വെള്ളം ഇല്ലാത്തത്, അമിതമായ വ്യായാമം, ദീർഘനേരം ഒരേ നിലയിൽ ഇരിക്കുകയോ നിൽക്കുകയോ ചെയ്യുന്നത്, പേശികൾക്ക് അമിതമായ സമ്മർദ്ദം എന്നിവ രാത്രിയിലെ മസിൽ ക്രാമ്പിന് കാരണമാകാം. ചിലരിൽ പൊട്ടാസ്യം, മഗ്നീഷ്യം, കാൽസ്യം തുടങ്ങിയ ധാതുക്കളുടെ കുറവും കാരണമാകാം.
പ്രായം കൂടുന്നതിനനുസരിച്ച് രാത്രിയിലെ കാലിലെ മസിൽ ക്രാമ്പ് ഉണ്ടാകാനുള്ള സാധ്യത വർധിക്കാം. ചില മരുന്നുകളുടെ ഉപയോഗവും രക്തയോട്ടവുമായി ബന്ധപ്പെട്ട പ്രശ്നങ്ങളും അപൂർവമായി ഇതിന് പിന്നിലുണ്ടാകാം.
വേദന അനുഭവപ്പെടുമ്പോൾ ബാധിച്ച പേശി പതുക്കെ വലിച്ചുനീട്ടുകയും മൃദുവായി മസാജ് ചെയ്യുകയും ചെയ്യുന്നത് ആശ്വാസം നൽകാം. ആവശ്യത്തിന് വെള്ളം കുടിക്കുന്നതും പതിവായി പേശികൾ സ്ട്രെച്ച് ചെയ്യുന്നതും ഇത്തരം പ്രശ്നങ്ങൾ കുറയ്ക്കാൻ സഹായിക്കും.
എന്നാൽ മസിൽവേദന പതിവായി ഉണ്ടാകുകയോ വളരെ ശക്തമായ വേദന, വീക്കം, മരവിപ്പ് തുടങ്ങിയ ലക്ഷണങ്ങൾക്കൊപ്പം വരികയോ ചെയ്താൽ കാരണം കണ്ടെത്താൻ ഡോക്ടറുടെ നിർദേശം തേടുന്നത് നല്ലതാണ്.
