കുഞ്ഞുങ്ങൾ നടക്കാൻ പഠിക്കുമ്പോൾ കാൽവിരലുകളിൽ ഊന്നി നടക്കുന്നത് സാധാരണ കാഴ്ചയാണ്. എന്നാൽ, ഈ ‘ടോ വാക്കിംഗ്’ രീതി മൂന്ന് വയസ്സ് കഴിഞ്ഞിട്ടും തുടരുകയാണെങ്കിൽ അത് അവഗണിക്കരുതെന്ന് വിദഗ്ധർ മുന്നറിയിപ്പ് നൽകുന്നു. ഇത് ഓട്ടിസം പോലുള്ള ഗുരുതരമായ അവസ്ഥകളുടെ ലക്ഷണമാകാൻ സാധ്യതയുണ്ടെന്നും പഠനങ്ങൾ സൂചിപ്പിക്കുന്നു.
പുതിയ പഠനങ്ങൾ അനുസരിച്ച്, ഓട്ടിസം ബാധിച്ച കുട്ടികളിൽ 20% മുതൽ 45% വരെ ടോ വാക്കിംഗ് രീതിയിൽ നടക്കുന്നു. അതേസമയം, സാധാരണ വളർച്ചയുള്ള കുട്ടികളിൽ ഇങ്ങനെ നടക്കുന്നത് വെറും 4.5 ശതമാനം മാത്രമാണ്. ഓട്ടിസമുള്ള ചില കുട്ടികൾക്ക് ഉപ്പൂറ്റി നിലത്ത് സ്പർശിക്കുമ്പോൾ ഉണ്ടാകുന്ന അസ്വസ്ഥതയാകാം ഈ രീതിയിൽ നടക്കാൻ പ്രേരിപ്പിക്കുന്നത്. മറ്റു ചില സാഹചര്യങ്ങളിൽ, ടോ വാക്കിംഗ് അവർക്ക് കൂടുതൽ ഇഷ്ടപ്പെട്ട നടത്ത രീതിയായിരിക്കാം. കുട്ടികളിലെ ഹൈപ്പർസെൻസിറ്റിവിറ്റി (അമിതമായ സംവേദനക്ഷമത), ഹൈപ്പോസെൻസിറ്റിവിറ്റി (കുറഞ്ഞ സംവേദനക്ഷമത) തുടങ്ങിയ ഘടകങ്ങളുമായി ബന്ധപ്പെട്ട കാര്യങ്ങളാണിത്.
ഈ വിഷയത്തിൽ കുട്ടികളുടെ ആവശ്യങ്ങൾക്കനുസരിച്ചുള്ള തെറാപ്പിയും വ്യക്തിഗതമായ പരിചരണവും അത്യാവശ്യമാണെന്ന് ഡോക്ടർമാർ അഭിപ്രായപ്പെടുന്നു. കുട്ടികളുടെ പ്രശ്നങ്ങൾ കൃത്യമായി മനസ്സിലാക്കി ഉപ്പൂറ്റി നിലത്ത് വെച്ച് നടക്കാൻ അവർക്ക് ആവശ്യമായ സഹായം നൽകണം. കൂടുതൽ ഗുരുതരമായ കേസുകളിൽ, ടോ വാക്കിംഗ് ശരിയാക്കാൻ ഡോക്ടർമാർ പ്രത്യേക ബ്രേസുകളോ കാസ്റ്റുകളോ നിർദ്ദേശിച്ചേക്കാം. അതിനാൽ, നിങ്ങളുടെ കുട്ടി മൂന്ന് വയസ്സ് കഴിഞ്ഞിട്ടും കാൽവിരലുകളിൽ ഊന്നിയാണ് നടക്കുന്നതെങ്കിൽ, ഒരു വിദഗ്ധ ഡോക്ടറെ കാണിക്കുന്നത് ഉചിതമാണ്. ഇത് നേരത്തെയുള്ള രോഗനിർണയത്തിനും ചികിത്സയ്ക്കും ഏറെ സഹായിക്കും.
