തിരുവനന്തപുരം: സ്ത്രീകളുടെ ജീവിതത്തിൽ ശരീരവും മനസും ഒരുപോലെ മാറ്റങ്ങൾ അനുഭവിക്കുന്ന പ്രധാന ഘട്ടമാണ് ആർത്തവ വിരാമം അഥവാ Menopause. സാധാരണയായി 45 മുതൽ 50 വയസ്സിനിടയിലാണ് മെനോപോസ് സംഭവിക്കുന്നത്. എന്നാൽ ചിലർക്കിത് നേരത്തെയും ഉണ്ടാകാം.
ക്രമം തെറ്റിയ ആർത്തവമാണ് മെനോപോസിന്റെ പ്രധാന ലക്ഷണങ്ങളിലൊന്ന്. മാസങ്ങളോളം ആർത്തവമില്ലാതെ നിന്ന ശേഷം കഠിനമായ രക്തസ്രാവം ഉണ്ടാകുകയോ, രണ്ടോ മൂന്നോ മാസം ഇടവിട്ട് രക്തസ്രാവം വരികയോ ചെയ്യാം. തുടർച്ചയായി 12 മാസം ആർത്തവം വരാതിരുന്നാൽ മെനോപോസ് സ്ഥിരീകരിക്കാമെന്ന് ആരോഗ്യ വിദഗ്ധർ വ്യക്തമാക്കുന്നു.
ഈ കാലയളവിൽ രക്തസ്രാവമോ സ്പോട്ടിംഗോ ഉണ്ടായാൽ നിർബന്ധമായും ഡോക്ടറെ സമീപിക്കണം. അൾട്രാസൗണ്ട് പരിശോധനയും ആവശ്യമായാൽ ബയോപ്സിയും നടത്തേണ്ടതുണ്ടെന്ന് വിദഗ്ധർ മുന്നറിയിപ്പ് നൽകുന്നു.
മെനോപോസിന്റെ ആദ്യഘട്ടത്തിൽ സാധാരണയായി കാണുന്ന മറ്റൊരു പ്രധാന ലക്ഷണമാണ് ‘ഹോട്ട് ഫ്ലാഷസ്’. ശരീരത്തിലാകെ പെട്ടെന്ന് ചൂട് വ്യാപിക്കുന്ന അനുഭവം, രാത്രിയിൽ അമിത വിയർപ്പ്, ഉറക്കമില്ലായ്മ, ശ്രദ്ധക്കുറവ് തുടങ്ങിയ പ്രശ്നങ്ങൾ ഇതുമൂലം ഉണ്ടാകാം. ചിലർക്ക് സ്ട്രെസ്, ഡിപ്രഷൻ തുടങ്ങിയ മാനസിക ബുദ്ധിമുട്ടുകളും അനുഭവപ്പെടാറുണ്ട്.
മെനോപോസിന് മുൻപുള്ള ഘട്ടമായ Perimenopause കാലത്ത് തന്നെ ശരീരം ഈ മാറ്റങ്ങളിലേക്ക് തയ്യാറാകാൻ തുടങ്ങും. ആർത്തവം ക്രമരഹിതമാകുന്നതും ഹോർമോൺ വ്യതിയാനങ്ങളും ഈ ഘട്ടത്തിൽ സാധാരണമാണ്.
ആർത്തവ വിരാമത്തിന് ശേഷം ഈസ്ട്രജൻ, പ്രൊജസ്ട്രോൺ ഹോർമോണുകളുടെ അളവ് കുറയുന്നതോടെ ഹൃദയാഘാതം, അസ്ഥി ദുർബലത, കൊളസ്ട്രോൾ വർധനം തുടങ്ങിയ ആരോഗ്യ പ്രശ്നങ്ങൾക്കും സാധ്യത കൂടും.
40 വയസ്സിന് മുകളിലുള്ള സ്ത്രീകൾ വർഷംതോറും സ്തനങ്ങളുടെ അൾട്രാസൗണ്ട് സ്കാനും Mammography പരിശോധനയും നടത്തേണ്ടത് പ്രധാനമാണെന്ന് ഡോക്ടർമാർ നിർദേശിക്കുന്നു. കൂടാതെ പാപ്സ്മിയർ ടെസ്റ്റ്, ബോൺ മിനറൽ ഡെൻസിറ്റി പരിശോധന, രക്തത്തിലെ പഞ്ചസാരയും കൊളസ്ട്രോളും പരിശോധിക്കൽ എന്നിവയും നിർബന്ധമാക്കണം.
ഗർഭാശയത്തിനുള്ളിലെ അസാധാരണ വളർച്ചകൾ കണ്ടെത്താൻ എൻഡോമെട്രിയൽ ബയോപ്സി ആവശ്യമായി വരാമെന്നും, പ്രത്യേകിച്ച് ഹോർമോൺ തെറാപ്പിക്ക് മുമ്പ് ഈ പരിശോധന നിർബന്ധമാണെന്നും ആരോഗ്യ വിദഗ്ധർ ചൂണ്ടിക്കാട്ടുന്നു.
ആർത്തവ വിരാമത്തിന് ശേഷമുള്ള ഏത് തരത്തിലുള്ള രക്തസ്രാവവും അവഗണിക്കരുതെന്നും ഉടൻ മെഡിക്കൽ പരിശോധന നടത്തണമെന്നും ഡോക്ടർമാർ മുന്നറിയിപ്പ് നൽകുന്നു.
