ശരീരകോശങ്ങളിലും ചില ഭക്ഷണങ്ങളിലും കാണപ്പെടുന്ന ‘പ്യൂരിനുകൾ’ എന്ന ജൈവ-സജീവ സംയുക്തങ്ങൾ വിഘടിച്ചുണ്ടാകുന്ന ഒരു മാലിന്യമാണ് യൂറിക് ആസിഡ്. സാധാരണ സാഹചര്യങ്ങളിൽ യൂറിക് ആസിഡ് രക്തത്തിൽ ലയിക്കുകയും വൃക്കകൾ വഴി മൂത്രത്തിലൂടെ പുറന്തള്ളപ്പെടുകയും ചെയ്യും. എന്നാൽ അമിതമായി യൂറിക് ആസിഡ് ഉൽപ്പാദിപ്പിക്കപ്പെടുകയോ ശരീരത്തിൽ നിന്ന് വേണ്ടത്ര പുറന്തള്ളപ്പെടാതിരിക്കുകയോ ചെയ്താൽ, സന്ധികളിൽ പരലുകൾ അടിഞ്ഞുകൂടുകയും അത് കഠിനമായ വേദനയ്ക്കും വീക്കത്തിനും കാരണമാവുകയും ചെയ്യും. അതിനാൽ ശരീരത്തിൽ യൂറിക് ആസിഡ് കൂടുതലുള്ളവർ ഭക്ഷണകാര്യങ്ങളിൽ പ്രത്യേക ശ്രദ്ധ നൽകേണ്ടതുണ്ട്.
യൂറിക് ആസിഡ് പ്രശ്നങ്ങൾ ഉള്ളവർ നിർബന്ധമായും ഒഴിവാക്കേണ്ട പ്രധാനപ്പെട്ട ഭക്ഷണങ്ങളിൽ ഒന്നാണ് റെഡ് മീറ്റ്. ഇതിൽ പ്യൂരിനുകൾ ധാരാളമായി അടങ്ങിയിട്ടുള്ളതിനാൽ ഇത് രക്തത്തിലെ യൂറിക് ആസിഡിന്റെ അളവ് വേഗത്തിൽ വർദ്ധിപ്പിക്കും. അതുപോലെതന്നെ മത്തി, നെത്തോലി, അയല, കക്ക, ടിന്നിലടച്ച ട്യൂണ തുടങ്ങിയ സമുദ്രവിഭവങ്ങളിലും ഉയർന്ന അളവിൽ പ്യൂരിനുകൾ അടങ്ങിയിരിക്കുന്നതിനാൽ ഇവയും ഒഴിവാക്കേണ്ടതാണ്. മധുരമുള്ള പാനീയങ്ങൾ, സോഡ, എനർജി ഡ്രിങ്കുകൾ, കൃത്രിമ ജ്യൂസുകൾ, ഹൈ ഫ്രക്ടോസ് കോൺ സിറപ്പ് അടങ്ങിയ പാനീയങ്ങൾ എന്നിവയും യൂറിക് ആസിഡിന്റെ അളവ് ഗണ്യമായി വർദ്ധിപ്പിക്കും.
മദ്യം രക്തത്തിലെ യൂറിക് ആസിഡിന്റെ അളവ് വർദ്ധിപ്പിക്കുകയും ഗൗട്ട് ഉണ്ടാകാനുള്ള സാധ്യത കൂട്ടുകയും ചെയ്യുന്നു. പ്രത്യേകിച്ച് ബിയറിൽ ഉയർന്ന അളവിൽ പ്യൂരിനുകൾ അടങ്ങിയിട്ടുണ്ട്. ബർഗറുകൾ, പിസ്സ, ഫ്രഞ്ച് ഫ്രൈസ്, ഫ്രൈഡ് ചിക്കൻ, ഇൻസ്റ്റന്റ് നൂഡിൽസ് തുടങ്ങിയ ഫാസ്റ്റ് ഫുഡുകളും ആരോഗ്യത്തിന് ഹാനികരമാണ്. കൂടാതെ കേക്കുകൾ, കുക്കികൾ, പേസ്ട്രികൾ, മിഠായികൾ, ഐസ്ക്രീം തുടങ്ങിയ മധുരമുള്ള പലഹാരങ്ങളും, സംസ്കരിച്ച മാംസവും ശരീരത്തിൽ വിഘടിച്ച് യൂറിക് ആസിഡ് വർദ്ധിപ്പിക്കാനും ഹൈപ്പർയൂറിസീമിയയ്ക്ക് കാരണമാവുകയും ചെയ്യുമെന്നതിനാൽ ഇവയെല്ലാം ഭക്ഷണത്തിൽ നിന്ന് ഒഴിവാക്കേണ്ടതാണ്.
