ഗർഭകാലത്തും ഫിറ്റ്നസിന്റെ കാര്യത്തിൽ വിട്ടുവീഴ്ച ചെയ്യാതെ നടി സാമന്ത. ജിമ്മിൽ സ്ട്രെങ്ത് ട്രെയിനിങ് നടത്തുന്ന താരത്തിന്റെ വിഡിയോ സമൂഹ മാധ്യമങ്ങളിൽ വൈറലായിരിക്കുകയാണ്. ഗർഭകാലത്ത് വ്യായാമം പതിവുപോലെയല്ലെന്നും, തീവ്രമായ പരിശീലനം ഒഴിവാക്കി ശരീരത്തിന്റെ താളം തിരിച്ചറിഞ്ഞാണ് താൻ വ്യായാമം ചെയ്യുന്നതെന്നും സാമന്ത ഇൻസ്റ്റാഗ്രാമിലൂടെ വ്യക്തമാക്കി.
ഡോക്ടറുടെ അനുമതിയോടെ, പ്രീനേറ്റൽ ഫിറ്റ്നസിൽ പരിശീലനം ലഭിച്ച ട്രെയിനറുടെ മേൽനോട്ടത്തിലാണ് താരം ഇപ്പോൾ വ്യായാമം ചെയ്യുന്നത്. ഗർഭകാലത്ത് സ്ട്രെങ്ത് ട്രെയിനിങ് എന്നു പറയുന്നത് കനത്ത ഭാരം ഉയർത്തുക എന്നതല്ല, മറിച്ച് ശരീരത്തിലെ പ്രധാന പേശികളെ ശക്തിപ്പെടുത്തുകയും വഴക്കം നിലനിർത്തുകയുമാണ്. സാധാരണ ഗർഭാവസ്ഥയിൽ ഡോക്ടറുടെ അനുമതിയോടെ ചെയ്യുന്ന മിതമായ വ്യായാമങ്ങൾ തികച്ചും സുരക്ഷിതവും ആരോഗ്യകരവുമാണ്.
സ്ട്രെങ്ത് ട്രെയിനിങ്ങിന്റെ പ്രധാന ഗുണങ്ങൾ
ശരീരത്തിലുണ്ടാകുന്ന മാറ്റങ്ങളെ താങ്ങാൻ പേശികൾക്ക് ബലം നൽകുന്നു.
ശരീരത്തിന്റെ പോസ്ചർ മെച്ചപ്പെടുത്തുകയും ഗർഭകാലത്ത് സാധാരണമായുണ്ടാകുന്ന നടുവേദന, ഇടുപ്പുവേദന തുടങ്ങിയ പ്രശ്നങ്ങൾ കുറയ്ക്കുകയും ചെയ്യുന്നു.
കൃത്യമായ വ്യായാമം രക്തത്തിലെ പഞ്ചസാരയുടെ അളവ് ക്രമീകരിക്കാനും ഗർഭകാല പ്രമേഹം തടയാനും സഹായിക്കുന്നു.
പ്രസവശേഷം ശരീരം പഴയ രീതിയിലേക്ക് തിരിച്ചെത്തുന്നതും ഊർജസ്വലത വീണ്ടെടുക്കുന്നതും വേഗത്തിലാക്കുന്നു.
സ്ട്രെസും ഉത്കണ്ഠയും കുറച്ച് നല്ല മാനസികാവസ്ഥ നൽകാൻ ഇത്തരം വ്യായാമങ്ങൾക്ക് സാധിക്കുന്നു.
ശ്രദ്ധിക്കേണ്ട കാര്യങ്ങൾ
വ്യായാമം ആരംഭിക്കുന്നതിന് മുൻപ് ഗൈനക്കോളജിസ്റ്റിന്റെ ഉപദേശം ഉറപ്പായും തേടണം.
വ്യായാമത്തിനിടയിലോ ശേഷമോ തലകറക്കം, അമിതമായ കിതപ്പ്, വേദന എന്നിവ അനുഭവപ്പെട്ടാൽ ഉടൻ തന്നെ വ്യായാമം നിർത്തി ഡോക്ടറെ കാണുക.
വീഴാനോ വയറിന് ആഘാതമേൽക്കാനോ സാധ്യതയുള്ള വ്യായാമങ്ങൾ പൂർണമായും ഒഴിവാക്കണം.
വ്യായാമത്തിന് മുൻപും ശേഷവും ആവശ്യത്തിന് വെള്ളം കുടിക്കുക.
ഗർഭകാല ഫിറ്റ്നസിൽ പരിചയസമ്പന്നരായ അംഗീകൃത പരിശീലകരുടെ മേൽനോട്ടത്തിൽ മാത്രം വ്യായാമം ചെയ്യുക.
ഗർഭാവസ്ഥയുടെ ആദ്യ മൂന്ന് മാസങ്ങൾക്ക് ശേഷം മലർന്നു കിടന്നുകൊണ്ടുള്ള വ്യായാമങ്ങൾ ഒഴിവാക്കണം. ഇത് രക്തയോട്ടത്തെ ബാധിക്കാൻ സാധ്യതയുണ്ട്.
ഗർഭകാലം ഓരോ വ്യക്തിയിലും വ്യത്യസ്തമായതിനാൽ മറ്റുള്ളവരെ അനുകരിക്കാതെ സ്വന്തം ആരോഗ്യസ്ഥിതിക്ക് അനുയോജ്യമായ രീതിയിൽ മാത്രം വ്യായാമങ്ങൾ തിരഞ്ഞെടുക്കുക.
