മുട്ട പുഴുങ്ങാൻ വെയ്ക്കുമ്പോൾ ഏറ്റവും വലിയ വെല്ലുവിളി അതിന്റെ തോട് പൊളിച്ചെടുക്കുക എന്നതായിരിക്കും. എന്നാൽ ഈ ബുദ്ധിമുട്ട് ഒഴിവാക്കാൻ വീട്ടിൽ എപ്പോഴും ലഭ്യമായ ഒരു ചെറുനാരങ്ങ മാത്രം മതിയാകും. മുട്ട പുഴുങ്ങാൻ വെക്കുന്ന വെള്ളത്തിൽ അൽപ്പം നാരങ്ങാനീര് ചേർക്കുന്നത് വഴി ഈ പ്രശ്നത്തിന് എളുപ്പത്തിൽ പരിഹാരം കാണാമെന്ന് കുക്കിങ് എക്സ്പേർട്ട്സ് പറയുന്നു.
വെള്ളത്തിൽ ചെറിയ അളവിൽ നാരങ്ങാനീര് ചേർക്കുമ്പോൾ അതില അടങ്ങിയിരിക്കുന്ന വീര്യം കുറഞ്ഞ ആസിഡ് വെള്ളത്തിന്റെ പി.എച്ച് നില ബാലൻസ് ചെയ്യുകയും, മുട്ടത്തോടിന്റെ പുറത്തെ പാളിയുടെ കട്ടി കൂട്ടുകയും ചെയ്യുന്നു. ഇത് വെള്ളം തിളയ്ക്കുമ്പോൾ മുട്ട തോട് പൊട്ടിപ്പോകുന്നത് തടയുന്നു.
നാരങ്ങാനീര് ചേർത്ത വെള്ളം ചെറുതായി അസിഡിക്കാകുന്നതോടെ ചൂട് എളുപ്പത്തിൽ കടന്നുപോവുകയും മുട്ട വളരെ വേഗത്തിൽ വെന്തു കിട്ടുകയും ചെയ്യും. മാത്രമല്ല, നാരങ്ങാനീര് ചേർത്തതുകൊണ്ട് മുട്ടയുടെ സ്വാദ് യാതൊരു കാരണവശാലും മാറില്ല. നാരങ്ങ ലഭ്യമല്ലെങ്കിൽ ഇതിനായി അൽപ്പം വിനാഗിരിയും ഉപയോഗിക്കാവുന്നതാണ്.
ശ്രദ്ധിക്കേണ്ട കാര്യം: വെള്ളം ചൂടാക്കുന്നതിന് മുമ്പാണ് അര ടീസ്പൂൺ നാരങ്ങാനീര് ചേർക്കേണ്ടത്. അതിനുശേഷം മുട്ടയിട്ട് വേവിക്കാവുന്നതാണ്. നാരങ്ങയിലെ ആസിഡിന്റെ സാന്നിധ്യം മുട്ടയുടെ വെള്ളയ്ക്കും തോടിനുമിടയിലുള്ള പാളിയുടെ ഘടനയെ മാറ്റിമറിക്കുന്നതിനാൽ, മുട്ട വെന്തതിനുശേഷം ചൂടാറുമ്പോൾ തോട് വളരെ എളുപ്പത്തിൽ ഇളക്കി മാറ്റാൻ സാധിക്കും.
