ഇന്തോനേഷ്യയിലെ കാട്ടുതീയിൽനിന്നുള്ള പുക വ്യാപിച്ചതോടെ തെക്കുകിഴക്കൻ ഏഷ്യയിൽ വായുമലിനീകരണം രൂക്ഷമാകുകയാണ്. ഒക്‌ടോബർ ഏഴിന് ഐക്യു എയറിന്റെ തത്സമയ പട്ടികയിൽ ലോകത്തിലെ ഏറ്റവും മലിനമായ നഗരമായി അടയാളപ്പെടുത്തിയത് സിംഗപ്പൂരിന്റെ പേരാണ്. നഗരത്തിലെ അഞ്ച് മേഖലകളിലെയും 24 മണിക്കൂർ വായുഗുണനിലവാര സൂചിക (പിഎസ്ഐ) അനാരോഗ്യകരമായ നിലയിലെത്തി. മലിനീകരണം വർദ്ധിച്ചതോടെ ആരോഗ്യപ്രശ്‌നങ്ങളെക്കുറിച്ചുള്ള ആശങ്കയും ശക്തമായി. അയൽ രാജ്യമായ മലേഷ്യയിലും സ്ഥിതി വഷളായതിനെ തുടർന്ന് വിവിധ പ്രദേശങ്ങളിൽ സ്‌കൂളുകൾ അടച്ചിടാൻ അധികൃതർ തീരുമാനിച്ചു.
എന്തുകൊണ്ടാണ് സിംഗപ്പൂരിൽ പുകമഞ്ഞ് രൂക്ഷമാകുന്നത്?
ഇന്തോനേഷ്യയിലെ സുമാത്ര, കലിമന്താൻ മേഖലകളിൽ പടരുന്ന കാട്ടുതീയാണ് നിലവിലെ പ്രതിസന്ധിയുടെ പ്രധാന കാരണം. വരണ്ട കാലാവസ്ഥയും എൽനിനോ പ്രതിഭാസവും തീപിടിത്തങ്ങൾക്ക് അനുകൂലമായ സാഹചര്യമൊരുക്കി. 11 വർഷത്തിനിടെയിലെ ഏറ്റവും രൂക്ഷമായ കാട്ടുതീകളിലൊന്നിലൂടെയാണ് ഇന്തോനേഷ്യ കടന്നുപോകുന്നതെന്നാണ് റിപ്പോർട്ട്.കൃഷിക്കും മറ്റ് ആവശ്യങ്ങൾക്കുമായി ഭൂമി വൃത്തിയാക്കാൻ മരങ്ങളും സസ്യങ്ങളും കത്തിക്കുന്ന രീതിയും തീപിടിത്തങ്ങളുടെ സാദ്ധ്യത വർദ്ധിപ്പിക്കുന്നു. പ്രത്യേകിച്ച് തണ്ണീർത്തടങ്ങളിലെ ജൈവപാളികളിൽ പടരുന്ന തീ ഭൂമിക്കടിയിൽ ദീർഘനേരം പുകയുകയും വീണ്ടും ആളിപ്പടരുകയും ചെയ്യാം. ഇന്തോനേഷ്യയിൽനിന്നുള്ള പുക സിംഗപ്പൂരിലേക്കും മലേഷ്യയുടെ വിവിധ ഭാഗങ്ങളിലേക്കും വ്യാപിക്കുന്നതാണ് പ്രതിസന്ധി രൂക്ഷമാക്കുന്നത്.
മലിനീകരണം എത്രത്തോളം രൂക്ഷമാകുന്നുണ്ട്?
ഇന്നലെ സിംഗപ്പൂരിലെ പടിഞ്ഞാറൻ മേഖലയിൽ 24 മണിക്കൂർ പിഎസ്ഐ 160 ആയി ഉയർന്നു. ബുധനാഴ്‌ച പടിഞ്ഞാറൻ സിംഗപ്പൂരിലെ ഒരു മണിക്കൂ‌റിലെ ശരാശരി പിഎം 2.5 ആയി രേഖപ്പെടുത്തി. ഇത്‌ ഉയർന്ന അളവിലുള്ള മലിനീകരണത്തെയാണ് സൂചിപ്പിക്കുന്നത്.വായുഗുണനിലവാരം വിലയിരുത്താൻ സിംഗപ്പൂരിൽ രണ്ട് സൂചികകളാണ് ഉപയോഗിക്കുന്നത്. പൊടിപടലങ്ങൾ ഉൾപ്പടെ മലിനീകരണത്തിന് കാരണമാകുന്ന ആറ് ഘടകങ്ങളെ അടിസ്ഥാനമാക്കിയാണ് പിഎസ്ഐ കണക്കാക്കുന്നത്. അതേസമയം, പിഎം 2.5 സൂചികയിൽ 2.5 മീറ്ററോ അതിൽ താഴെയോ വലിപ്പമുള്ള സൂക്ഷ്‌മകണങ്ങളുടെ സാന്ദ്രതയാണ് അളക്കുന്നത്. ഇവ ശ്വാസകോശത്തിലേക്ക് ആഴത്തിൽ പ്രവേശിക്കാൻ സാദ്ധ്യതയുള്ളവയാണ്.
ആരോഗ്യത്തിനും കായിക മേളകൾക്കും ഭീഷണി
മലിനീകരണം വർദ്ധിക്കുന്ന സാഹചര്യത്തിൽ കഠിനമായ വ്യായാമങ്ങളും ദീർഘനേരത്തെ പുറംജോലികളും ഒഴിവാക്കാൻ സിംഗപ്പൂരിലെ ദേശീയ പരിസ്ഥിതി അധികൃതർ നിർദേശം നൽകി. കുട്ടികൾ, പ്രായമായവർ, ഗർഭിണികൾ, ഹൃദയ- ശ്വാസകോശ രോഗമുള്ളവർ ഇവരെല്ലാം പ്രത്യേക ജാഗ്രത പാലിക്കണമെന്നാണ് നിർദേശം. സിംഗപ്പൂർ ഫോർമുല വൺ ഗ്രാൻഡ് പ്രീ മത്സരവും മലിനീകരണത്തിന്റെ പശ്ചാത്തലത്തിൽ ശ്രദ്ധിക്കപ്പെടുകയാണ്. പുകമഞ്ഞ് നിലനിൽക്കുന്ന സാഹചര്യമാണെങ്കിലും മത്സരം നടത്താനാണ് തീരുമാനമെന്നും ആവശ്യമെങ്കിൽ എൻ95 മാസ്‌കുകൾ ലഭ്യമാക്കുമെന്നും സംഘാടകർ അറിയിച്ചു.അതിനിടെ, മലേഷ്യയിലെ ജോഹോർ സംസ്ഥാനത്തെ ബതു പഹാത്തിൽ സ്‌കൂളുകളും ശിശുപരിചരണ കേന്ദ്രങ്ങളും അടച്ചിടാൻ നിർദേശിച്ചു. ജോഹോർ, മെലാക്ക, നെഗെരി സെംബിലാൻ, സെലാംഗോർ എന്നിവിടങ്ങളിലും ക്വാലാലംപൂർ, പുത്രജയ എന്നീ ഫെഡറൽ പ്രദേശങ്ങളിലും വിദ്യാഭ്യാസമന്ത്രിയുടെ നിർദേശപ്രകാരം സ്‌കൂളുകൾ അടച്ചിട്ടു.
