മറ്റൊരു മുറിയിലേക്ക് കടക്കുമ്പോൾ എന്തിനാണ് ഇങ്ങോട്ട് വന്നതെന്ന് മറന്നുപോകുന്നത്? കാരണം ഇതാണ്!

ഒരു മുറിയിൽനിന്ന് മറ്റൊരു മുറിയിലേക്ക് കടന്നതിനു പിന്നാലെ എന്തിനാണ് അവിടേക്ക് വന്നതെന്ന് മറന്നുപോകുന്ന അനുഭവം പലർക്കുമുണ്ട്. ദൈനംദിന ജീവിതത്തിൽ സാധാരണയായി സംഭവിക്കുന്ന ഈ പ്രതിഭാസത്തിന് പിന്നിൽ തലച്ചോറിന്റെ പ്രവർത്തനവുമായി ബന്ധപ്പെട്ട ഒരു വിശദീകരണമുണ്ട്.

മുറിയുടെ വാതിൽ കടക്കുമ്പോൾ പരിസരത്തിലെ മാറ്റം തലച്ചോർ ഒരു പുതിയ സംഭവത്തിന്റെ തുടക്കമായി തിരിച്ചറിയാം. ഇതിനെ ‘ഡോർവേ ഇഫക്ട്’ (Doorway Effect) എന്നാണ് വിളിക്കുന്നത്. ഒരു സ്ഥലത്തുനിന്ന് മറ്റൊരിടത്തേക്ക് മാറുമ്പോൾ തലച്ചോർ വിവരങ്ങളെ പുതിയ സന്ദർഭങ്ങളായി ക്രമീകരിക്കുന്നതിനിടെ തൊട്ടുമുമ്പുള്ള ഉദ്ദേശ്യം താൽക്കാലികമായി ഓർമയിൽനിന്ന് മങ്ങിപ്പോകാം.

എന്തെങ്കിലും എടുക്കാനോ ഒരു കാര്യം ചെയ്യാനോ വേണ്ടി മറ്റൊരു മുറിയിലേക്ക് പോയപ്പോൾ ലക്ഷ്യം മറന്നുപോകുന്നത് ഇതിന് ഉദാഹരണമാണ്. എന്നാൽ പഴയ മുറിയിലേക്കു മടങ്ങുമ്പോൾ എന്തിനാണ് പോയതെന്ന് വീണ്ടും ഓർമവരാനും സാധ്യതയുണ്ട്.

ഉറക്കക്കുറവ്, മാനസിക സമ്മർദം, ഒരേസമയം പല കാര്യങ്ങളിൽ ശ്രദ്ധ കേന്ദ്രീകരിക്കൽ എന്നിവയും ഇത്തരം മറവികൾക്ക് കാരണമാകാം. ഇടയ്ക്കിടെ സംഭവിക്കുന്ന ഇത്തരം മറവികൾ മാത്രം ഓർമക്കുറവിന്റെ രോഗലക്ഷണമാണെന്ന് കരുതേണ്ടതില്ല.

എന്നാൽ മറവി പതിവായി വർധിക്കുകയോ ദൈനംദിന പ്രവർത്തനങ്ങളെ ബാധിക്കുകയോ മറ്റ് ആശയക്കുഴപ്പങ്ങൾ അനുഭവപ്പെടുകയോ ചെയ്താൽ ഡോക്ടറുടെ ഉപദേശം തേടണം.