ദീർഘനേരം ഒരേ സ്ഥാനത്ത് ഇരുന്ന് ജോലി ചെയ്യുന്നത് പുകവലിക്ക് സമാനമായ ആരോഗ്യപ്രശ്നങ്ങൾ ഉണ്ടാക്കാമെന്ന് പുതിയ പഠനങ്ങൾ സൂചിപ്പിക്കുന്നു. ജീവിതശൈലീ രോഗങ്ങൾ വർധിക്കുന്ന സാഹചര്യത്തിൽ ഇത്തരം ശീലങ്ങൾ ഹൃദയത്തെയും രക്തക്കുഴലുകളെയും ബാധിക്കുന്ന വലിയ അപകടസാധ്യത ഉയർത്തുന്നുണ്ട്.
തുടർച്ചയായി ഇരിക്കുന്നത് കാലുകളിലേക്കുള്ള രക്തപ്രവാഹം തടസ്സപ്പെടുത്തുകയും വെരിക്കോസ് വെയ്ൻ, കാലിലെ വീക്കം, രക്തം കട്ടപിടിക്കൽ തുടങ്ങിയ പ്രശ്നങ്ങൾക്ക് കാരണമാകുകയും ചെയ്യാം. ഇതിന് പരിഹാരമായി വിദഗ്ധർ നിർദ്ദേശിക്കുന്നത് ഓരോ മണിക്കൂറിലും കണങ്കാൽ മുകളിലേക്കും താഴേക്കും ഏകദേശം 30 തവണ ചലിപ്പിക്കുന്നതാണ്. വെറും 30 സെക്കന്റ് മാത്രം വേണ്ടിവരുന്ന ഈ ലഘുവ്യായാമം രക്തപ്രവാഹം മെച്ചപ്പെടുത്താനും പേശികൾക്ക് കരുത്ത് നൽകാനും സഹായിക്കും.
ഓഫീസ് ജോലികളിൽ ഏർപ്പെട്ടിരിക്കുന്നവർ ഇടയ്ക്കിടെ എഴുന്നേറ്റ് നടക്കുന്നതും ശീലമാക്കണം. ഓരോ മണിക്കൂറിലും കുറഞ്ഞത് 10 മിനിറ്റ് നടക്കുന്നത് പേശികളെ സജീവമാക്കാൻ സഹായിക്കും. കൂടാതെ ഇരുന്നുകൊണ്ട് തന്നെ ശരീരം കുനിച്ചും കഴുത്ത് വശങ്ങളിലേക്ക് ചലിപ്പിച്ചും പേശികളിലെ മുറുക്കം കുറയ്ക്കാം.
കമ്പ്യൂട്ടറിന് മുന്നിൽ ഇരിക്കുമ്പോൾ നട്ടെല്ല് നിവർത്തി, പാദങ്ങൾ നിലത്ത് സമമായി വച്ച് ഇരിക്കുന്ന രീതിയും പിന്തുടരുന്നത് നടുവേദന ഒഴിവാക്കാൻ സഹായിക്കും. ഇത്തരം ചെറിയ ശീലങ്ങളിൽ മാറ്റം വരുത്തുന്നത് പോലും വലിയ ആരോഗ്യപ്രശ്നങ്ങളിൽ നിന്ന് സംരക്ഷണം നൽകും.
