മലയാളിയുടെ ദൈനംദിന ജീവിതരീതികളിൽ ഇന്ന് വലിയ മാറ്റങ്ങളാണ് വന്നുകൊണ്ടിരിക്കുന്നത്. ഒരുകാലത്ത് സമ്പന്നർ മാത്രമായിരുന്നു വീടുകളിൽ എയർകണ്ടീഷണറുകൾ വെച്ചിരുന്നത്. എന്നാൽ കാലം മാറിയപ്പോൾ എസി നമ്മുടെ ജീവിതത്തിന്റെ ഭാഗമായി മാറിക്കഴിഞ്ഞു. സാങ്കേതികവിദ്യയുടെ വളർച്ചയും മാറുന്ന ആധുനിക ജീവിതസാഹചര്യങ്ങളും കാരണം ഭൂരിഭാഗം വീടുകളിലും ഓഫീസുകളിലും എസി ഇന്ന് ഒഴിച്ചുകൂടാനാവാത്ത ഒരു ഉപകരണമാണ്.
നമ്മുടെ ഒരു ദിവസത്തെ ഭൂരിഭാഗം സമയവും കടന്നുപോകുന്നത് എസി മുറികളിലാണ്. ഐടി പാർക്കുകൾ, കോർപ്പറേറ്റ് ഓഫീസുകൾ, ബാങ്കുകൾ, മറ്റ് തൊഴിലിടങ്ങൾ എന്നിവടങ്ങളിലെ എസി തണുപ്പിൽ 8 മുതൽ 10 മണിക്കൂർ വരെ ജോലി ചെയ്ത ശേഷമാണ് പലരും വീട്ടിലെത്തുന്നത്. അവിടെയും കിടപ്പുമുറികളിൽ എസി ഓൺ ചെയ്ത് അതിനുള്ളിലാണ് രാത്രികാലങ്ങളിലെ ദീർഘനേരത്തെ ഉറക്കം. ചുരുക്കത്തിൽ, ദിവസത്തിൽ 15 മുതൽ 18 മണിക്കൂർ വരെ അടച്ചിട്ട എസി മുറികളിൽ ചെലവഴിക്കുന്ന രീതിയിലേക്ക് മലയാളി മാറിക്കഴിഞ്ഞു.
എന്നാൽ, തൊഴിലിടങ്ങളിലും കിടപ്പുമുറികളിലുമായി ഇങ്ങനെ നിരന്തരം എസി വായു ശ്വസിക്കുന്നത് നമ്മുടെ ശരീരത്തെ എങ്ങനെ ബാധിക്കുന്നു എന്ന ചോദ്യം പ്രസക്തമാണ്. പ്രത്യേകിച്ച്, എസി മുറികളിലെ ഈ ദീർഘനേരത്തെ ഇരിപ്പും ഉറക്കവും ശരീരത്തിന്റെ സ്വാഭാവിക രോഗപ്രതിരോധ ശേഷിയെ ദോഷകരമായി ബാധിക്കുമോ എന്ന ആശങ്ക പലരിലും ശക്തമാണ്. ഇതിന്റെ യഥാർത്ഥ വസ്തുതകൾ എന്തെല്ലാമാണെന്ന് പരിശോധിക്കാം. എസി മുറികളിൽ ദീർഘനേരം ഉറങ്ങി ഉണരുമ്പോൾ തൊണ്ടവേദന, മൂക്കിലെ വരൾച്ച, സൈനസ് അസ്വസ്ഥതകൾ, ചുമ, അല്ലെങ്കിൽ വിട്ടുമാറാത്ത തുമ്മൽ എന്നിവ അനുഭവപ്പെടുന്നതായി പലരും പരാതിപ്പെടാറുണ്ട്.
പ്രതിരോധ ശേഷി കുറയുന്നത് കൊണ്ടാണ് ഇത് സംഭവിക്കുന്നതെന്നാണ് പലരും കരുതുന്നത്. എന്നാല് എസി മുറിക്കുള്ളിൽ കിടന്ന് ഉറങ്ങുന്നത് കൊണ്ട് ശരീരത്തിലെ പ്രതിരോധ ശേഷി കുറയില്ലെന്ന് ശ്വാസകോശ രോഗവിദഗ്ദ്ധനായ ഡോ. മാനസ് മെംഗാർ പറയുന്നത്. എസി സ്വയം നമ്മുടെ പ്രതിരോധശേഷി കുറയ്ക്കുന്നില്ലെന്നും, മറിച്ച് നമ്മൾ അത് എങ്ങനെ ഉപയോഗിക്കുന്നു എന്നതിലാണ് കാര്യമെന്നും ഡോക്ടർ പറയുന്നു. പിന്നെ എന്തുകൊണ്ടാണ് എസി മുറിക്കുള്ളിൽ ഉറങ്ങി എഴുന്നേൽക്കുമ്പോൾ തൊണ്ടവേദനയും ചുമയും തുമ്മലുമൊക്കെ അനുഭവപ്പെടുന്നത് എന്നല്ലേ..
യഥാർഥത്തിൽ മുറിക്കുള്ളിലെ വരണ്ട വായുവും എസിയുടെ ശുചിത്വമില്ലായ്മയുമാണ് ഇതിന് കാരണമെന്നാണ് ഡോക്ടർമാർ പറയുന്നത്. എയർ കണ്ടീഷണറുകൾ മുറിയിലെ ഈർപ്പം ഗണ്യമായി കുറയ്ക്കുന്നു. ഇത് നമ്മുടെ മൂക്ക്, തൊണ്ട, ശ്വാസനാളം എന്നിവയിലെ നനവുള്ള ഉപരിതലത്തെ വരണ്ടതാക്കുന്നു. സാധാരണഗതിയിൽ ഈ നനവുള്ള ഭാഗങ്ങളാണ് പൊടിപടലങ്ങൾ, വൈറസുകൾ, മലിനീകരണ വസ്തുക്കൾ എന്നിവയ്ക്കെതിരെ ശരീരത്തിന്റെ സ്വാഭാവിക പ്രതിരോധ മതിലായി പ്രവർത്തിക്കുന്നത്.
ഇവ വരണ്ടുപോകുമ്പോൾ ശ്വാസകോശ നാളികളിൽ അസ്വസ്ഥത വർധിക്കുകയും ചെയ്യും. മറ്റൊന്ന് ശുചിത്വമില്ലായമയാണ്. കൃത്യമായി വൃത്തിയാക്കാത്ത എസി ഫിൽട്ടറുകളാണ് മറ്റൊരു വില്ലൻ. വൃത്തിഹീനമായ ഫിൽട്ടറുകൾ മുറിക്കുള്ളിലെ പൊടിപടലങ്ങൾ, പൂപ്പൽ , ബാക്ടീരിയകൾ, മറ്റ് അലർജനുകൾ എന്നിവ വായുവിലൂടെ വീണ്ടും വീണ്ടും സർക്കുലേറ്റ് ചെയ്യാൻ കാരണമാകുന്നു. ഇത് തുമ്മൽ, ചുമ, സൈനസ് അസ്വസ്ഥതകൾ അല്ലെങ്കിൽ ആസ്ത്മ പോലുള്ള രോഗങ്ങൾ വഷളാകാൻ ഇടയാക്കും.
കൂടാതെ പുറത്തെ കഠിനമായ ചൂടിൽ നിന്നും എസി മുറിയിലെ തണുപ്പിലേക്ക് പെട്ടെന്ന് മാറി മാറി പ്രവേശിക്കുന്നത് ശ്വസനവ്യവസ്ഥയ്ക്ക് സമ്മർദ്ദമുണ്ടാക്കുമെന്ന് ഡോക്ടർമാർ ചൂണ്ടിക്കാണിക്കുന്നു. പെട്ടെന്നുള്ള താപനില വ്യത്യാസങ്ങൾ ശ്വാസകോശ നാളികളിൽ അസ്വസ്ഥത ഉണ്ടാക്കാം, പ്രത്യേകിച്ച് ആസ്ത്മ, അലർജിക് റൈനൈറ്റിസ്, സൈനസൈറ്റിസ് അല്ലെങ്കിൽ സെൻസിറ്റീവ് ശ്വാസനാളമുള്ളവരിൽ ഇത് കൂടുതൽ ബാധിക്കാം. അമിതമായ ചൂടിൽ നിന്ന് പെട്ടെന്ന് തണുപ്പുള്ള മുറിയിലേക്ക് നടക്കുന്നത് മൂക്കടപ്പ്, തൊണ്ടയിലെ അസ്വസ്ഥത, ചുമ അല്ലെങ്കിൽ ശ്വാസതടസ്സം എന്നിവയ്ക്ക് കാരണമായേക്കാം. എന്നിരുന്നാലും, താപനിലയിലെ മാറ്റം നേരിട്ട് അണുബാധ ഉണ്ടാക്കുന്നില്ലെന്ന് ഡോക്ടർമാർ വ്യക്തമാക്കുന്നു.
