ദഹനവ്യവസ്ഥയിലെ സൂക്ഷ്മാണുക്കളുടെ സന്തുലിതാവസ്ഥയെയും പ്രവർത്തനത്തെയുമാണ് ‘ഗട്ട് ഹെൽത്ത്’ അഥവാ കുടലിന്റെ ആരോഗ്യം എന്നത് കൊണ്ട് അർത്ഥമാക്കുന്നത്. ദഹനം മുതൽ ശരീരത്തിന്റെ പ്രതിരോധശേഷി വരെയുള്ള കാര്യങ്ങളെ ഇത് നേരിട്ട് സ്വാധീനിക്കുന്നുണ്ട്. ക്ഷീണം, വയറുവേദന, ചർമ്മരോഗങ്ങൾ തുടങ്ങിയ ലക്ഷണങ്ങളിലൂടെ കുടലിന്റെ ആരോഗ്യം മോശമാണെന്ന് തിരിച്ചറിയാം. കുടലിന്റെ സന്തുലിതാവസ്ഥ തകർക്കുന്ന പ്രധാനപ്പെട്ട ആറ് ഭക്ഷണവിഭവങ്ങൾ താഴെ പറയുന്നവയാണ്.
അൾട്രാ-പ്രോസസ്ഡ് ഭക്ഷണങ്ങൾ: അൾട്രാ-പ്രോസസ്ഡ് ഭക്ഷണങ്ങൾ കുടലിലെ ഗുണകരമായ ബാക്ടീരിയകളുടെ വൈവിധ്യം കുറയ്ക്കുകയും, സംരക്ഷണ ആവരണത്തിന് കേടുപാടുകൾ വരുത്തുകയും ചെയ്യുന്നു. കുടലിലെ നല്ല ബാക്ടീരിയകളുടെ വളർച്ചയ്ക്ക് ആവശ്യമായ പ്രകൃതിദത്ത നാരുകൾ ഇത്തരം ഭക്ഷണങ്ങളിൽ അടങ്ങിയിട്ടില്ല.
മിഠായികളും മധുരപാനീയങ്ങളും: മിഠായികൾ, മധുര പലഹാരങ്ങൾ, പഞ്ചസാര ചേർത്ത പാനീയങ്ങൾ എന്നിവ രക്തത്തിലെ ഇൻസുലിൻ വേഗത്തിൽ ഉയർത്തുന്നതിനൊപ്പം ദോഷകരമായ ബാക്ടീരിയകളുടെ വളർച്ചയെയും പ്രോത്സാഹിപ്പിക്കുന്നു. ഇത് കുടലിലെ സംരക്ഷണ ആവരണത്തെ ദുർബലപ്പെടുത്തുന്നു.
എണ്ണയിൽ വറുത്തതും കൊഴുപ്പേറിയതുമായ ഭക്ഷണങ്ങൾ: ഫ്രഞ്ച് ഫ്രൈസ്, കൊഴുപ്പുള്ള മാംസം തുടങ്ങിയവ ദഹിക്കാൻ ഏറെ സമയമെടുക്കുന്നു. ഇത് ദഹനപ്രക്രിയ മന്ദഗതിയിലാക്കുകയും വയറു വീർക്കുന്നതിനും ക്ഷീണത്തിനും കാരണമാവുകയും ചെയ്യും.
കൃത്രിമ മധുരമുള്ള പാനീയങ്ങൾ: പഞ്ചസാരയും കൃത്രിമ മധുരവും അടങ്ങിയ പാനീയങ്ങളുടെ അമിത ഉപഭോഗം സൂക്ഷ്മജീവികളുടെ വൈവിധ്യം കുറയ്ക്കുന്നു. ഇത് ദോഷകരമായ ബാക്ടീരിയകളെ ഉൽപ്പാദിപ്പിക്കുകയും, ആരോഗ്യകരമായ ഷോർട്ട്-ചെയിൻ ഫാറ്റി ആസിഡുകളെ കുറയ്ക്കുകയും ചെയ്യുന്നു.
മദ്യം: മദ്യം കുടലിന്റെ ആഗിരണശേഷിയിൽ മാറ്റം വരുത്തുകയും ദഹനവ്യവസ്ഥയുടെ സ്വാഭാവിക സന്തുലിതാവസ്ഥയെ തകരാറിലാക്കുകയും ചെയ്യുന്നു. ഇത് നല്ല ബാക്ടീരിയകളെ നശിപ്പിക്കാനും കുടലിന്റെ ആവരണം ദുർബലപ്പെടുത്താനും ഇടയാക്കും.
സംസ്കരിച്ച മാംസം: സോസേജ്, ബേക്കൺ തുടങ്ങിയവ അമിതമായി കഴിക്കുന്നത് കുടലിൽ വീക്കം ഉണ്ടാകാനുള്ള സാധ്യത വർദ്ധിപ്പിക്കുന്നു. ഇത് കുടലിലെ ബാക്ടീരിയ വൈവിധ്യം കുറയ്ക്കുകയും കുടൽ പാളിക്ക് കേടുപാടുകൾ വരുത്തുകയും ചെയ്യും
