ദൈനംദിന ഭക്ഷണത്തിൽ ഒഴിവാക്കാനാകാത്ത ഘടകമാണ് ഉപ്പ്. എന്നാൽ വിപണിയിൽ ലഭ്യമായ വിവിധതരം ഉപ്പുകളിൽ ഏതാണ് ആരോഗ്യത്തിന് കൂടുതൽ അനുയോജ്യമെന്ന കാര്യത്തിൽ പലർക്കും സംശയമുണ്ട്. സാധാരണ ഉപ്പ്, അയഡൈസ്ഡ് ഉപ്പ്, ഹിമാലയൻ പിങ്ക് സാൾട്ട്, കടൽ ഉപ്പ്, കല്ലുപ്പ് തുടങ്ങി നിരവധി ഇനങ്ങളാണ് വിപണിയിലുള്ളത്.
ഓരോ ഉപ്പിനും നിറത്തിലും ഘടനയിലും ധാതുക്കളുടെ അളവിലും വ്യത്യാസങ്ങളുണ്ട്. എന്നാൽ പിങ്ക് സാൾട്ടിലോ കല്ലുപ്പിലോ പ്രത്യേക ആരോഗ്യഗുണങ്ങൾ കൂടുതലാണെന്ന് കരുതുന്നത് ശരിയല്ല. ഇവയിലും പ്രധാനമായും സോഡിയം ക്ലോറൈഡാണ് അടങ്ങിയിരിക്കുന്നത്.
ആരോഗ്യത്തിന്റെ കാര്യത്തിൽ ഉപ്പിന്റെ നിറത്തേക്കാളും ഇനത്തേക്കാളും പ്രധാനമാണ് അതിലെ സോഡിയത്തിന്റെ അളവും ഉപയോഗിക്കുന്ന അളവും. അയഡിൻ ചേർത്ത ഉപ്പ് ഉപയോഗിക്കുന്നത് ശരീരത്തിന് ആവശ്യമായ അയഡിൻ ലഭിക്കാൻ സഹായിക്കും. തൈറോയ്ഡ് ഗ്രന്ഥിയുടെ ശരിയായ പ്രവർത്തനത്തിനും അയഡിൻ പ്രധാനമാണ്.
അതേസമയം അമിതമായ ഉപ്പിന്റെ ഉപയോഗം ഉയർന്ന രക്തസമ്മർദ്ദത്തിനും ഹൃദയസംബന്ധമായ ആരോഗ്യപ്രശ്നങ്ങൾക്കും കാരണമാകാം. അതിനാൽ ഉപ്പിന്റെ ഉപയോഗം നിയന്ത്രിക്കേണ്ടത് അത്യാവശ്യമാണ്.
ലോകാരോഗ്യ സംഘടനയുടെ നിർദേശപ്രകാരം മുതിർന്നവർ ഒരു ദിവസം അഞ്ച് ഗ്രാമിൽ താഴെ ഉപ്പ് മാത്രമേ ഉപയോഗിക്കാവൂ. അതായത് ഏകദേശം ഒരു ടീസ്പൂണിൽ താഴെ.
