ചില രോഗങ്ങള്‍ ക്രമേണ നമ്മെ കീഴ്‌പ്പെടുത്തുന്നത് നാം അറിയാതെ പോകാം. വിശേഷിച്ച് ആദ്യഘട്ടങ്ങളില്‍ ലക്ഷണങ്ങള്‍ പ്രകടമാകാതിരിക്കുന്ന അസുഖങ്ങള്‍ . ഇത്തരം രോഗങ്ങളെ ‘സൈലന്റ് കില്ലേഴ്‌സ്’ അഥവാ ‘നിശബ്ദഘാതകര്‍’ എന്നാണ് വിളിക്കുന്നത്.
തീര്‍ത്തും നിശബ്ദമായി- നാം അറിയാതെ നമ്മെ ആക്രമിച്ച് കീഴടക്കുന്ന രോഗങ്ങള്‍ എന്നാണിവയെ അര്‍ത്ഥമാക്കുന്നത്. അത്തരത്തിലുള്ള ആറ് രോഗങ്ങളെ കുറിച്ചാണിനി വിശദീകരിക്കുന്നത്.
ഒന്ന്…
ഉയര്‍ന്ന രക്തസമ്മര്‍ദ്ദം അഥവാ ‘ഹൈപ്പര്‍ടെന്‍ഷന്‍’ ( ബിപി) ആണ് ഈ പട്ടികയില്‍ വരുന്ന ഒരു രോഗം. ലക്ഷണങ്ങള്‍ പ്രകടമാകുന്നില്ല എന്നതിനാല്‍ തന്നെ ബിപിയുള്ളത് അറിയാതെ പോകാന്‍ സാധ്യതകളേറെയാണ്. ഹൃദയാഘാതം, പക്ഷാഘാതം പോലുള്ള ഗൗരവതരമായ പ്രശ്‌നങ്ങള്‍ ബിപി മൂലം സംഭവിക്കാം.
കൃത്യമായ ഇടവേളകളില്‍ ഡെിക്കല്‍ പരിശോധന നടത്തി ബിപിയുണ്ടോ ഇല്ലയോ എന്ന് ഉറപ്പിക്കുന്നതിലൂടെയും ആരോഗ്യകരമായ ജീവിതരീതി പിന്തുടരുന്നതിലൂടെയും ഈ അപകടത്തെ നമുക്ക് അകറ്റിനിര്‍ത്താം.
രണ്ട്…
ഹൃദയധമനികള്‍ ചുരുങ്ങി വരുന്ന അസുഖമായ ‘കൊറോണറി ആര്‍ട്ടറി ഡിസീസ്’ ആണ് ഈ പട്ടികയില്‍ പെടുന്ന മറ്റൊന്ന്. പേരില്‍ സൂചനയുള്ളത് പോലെ ഇത് ഹൃദയത്തെ തന്നെയാണ് പ്രധാനമായും ബാധിക്കുക. ഹൃദയത്തെ ബാധിക്കുന്ന ചെറുതും വലുതുമായ രോഗങ്ങള്‍ മുതല്‍ ഹൃദയാഘാതം വരെയുള്ള അവസ്ഥയിലേക്ക് ഇതെത്തിക്കാം.
ഇതും ഹൃദയാരോഗ്യവുമായി ബന്ധപ്പെട്ട പരിശോധനകള്‍ കൃത്യമായി നടത്താത്തവരില്‍ വൈകി അറിയുന്നൊരു രോഗമാണ്. മിക്കവാറും സങ്കീര്‍ണമായ സാഹചര്യങ്ങളില്‍ മാത്രമാണ് രോഗം കണ്ടെത്തപ്പെടാറ്. ആരോഗ്യകരമായ ജീവിതരീതി തീര്‍ച്ചയായും ഒരു പരിധി വരൈങ്കിലും ഈ രോഗത്തെ തടയും.
മൂന്ന്…
ജീവിതശൈലീരോഗങ്ങളില്‍ ഏറ്റവും സാധാരണമായി നാം കണക്കാക്കുന്ന ഒന്നാണ് പ്രമേഹം അഥവാ ‘ഷുഗര്‍’. ടൈപ്പ്-1 , ടൈപ്പ്- 2 എന്നിങ്ങനെ രണ്ട് തരം പ്രമേഹങ്ങളുണ്ട്. ലക്ഷണങ്ങള്‍ പ്രകടമാകാതിരിക്കുന്നു എന്നതിനാല്‍ തന്നെ പ്രമേഹവും നേരത്തേ പറഞ്ഞത് പോലെ തിരിച്ചറിയപ്പെടാതെ പോകാറുണ്ട്.
എന്നാല്‍ പിന്നീട് ഹൃദയം, വൃക്കകള്‍, കണ്ണുകള്‍ എന്നീ അവയവങ്ങളെയെല്ലാം ഗൗരവതരമായ രീതിയില്‍ ബാധിക്കപ്പെടാന്‍ പ്രമേഹം ഇടയാക്കുന്നു. ജീവിതശൈലീരോഗങ്ങളുണ്ടോയെന്നത് കൃത്യമായ ഇടവേളകളില്‍ ഡെിക്കലി പരിശോധിച്ച് ഉറപ്പുവരുത്തുക മാത്രമേ ഇതിന് പ്രതിവിധിയായിട്ടുള്ളൂ. പ്രമേഹമുണ്ടെന്ന് കണ്ടെത്തിയാല്‍ ഡോക്ടറുടെ നിര്‍ദേശപ്രകാരം ഡയറ്റ് അടക്കമുള്ള ജീവിതരീതി മെച്ചപ്പെടുത്തുകയും വേണം.
നാല്..
എല്ല് തേയ്മാനം അഥവാ ‘ഓസ്റ്റിയോപോറോസിസ്’ എന്ന രോഗമാണ് മറ്റൊരു നിശബ്ദഘാതകന്‍. ഇതും പലപ്പോഴും ഗുരുതരമായ പൊട്ടലോ പരിക്കോ ഏറ്റ ശേഷമാണ് മിക്കവരും തിരിച്ചറിയുന്നത്. എന്നാല്‍ അപ്പോഴേക്ക് സമയം ചികിത്സിച്ച് സുഖപ്പെടുത്താന്‍ സമയം വൈകിക്കാണും.
കാത്സ്യം, വൈറ്റമിന്‍-ഡി പോലുള്ള ഘടകങ്ങള്‍ ധാരാളമായി അടങ്ങിയിട്ടുള്ള ഭക്ഷണങ്ങള്‍ ഡയറ്റിലുള്‍പ്പെടുത്തുന്നതും, എല്ലുകളെയും പേശികളെയും ബലപ്പെടുത്തുന്നതിനുള്ള വ്യായാമങ്ങള്‍ പതിവായി ചെയ്യുന്നതും എല്ലാം എല്ല് തേയ്മാനത്തിനുള്ള സാധ്യതകള്‍ ഇല്ലാതാക്കുന്നു.
അഞ്ച്…
നിങ്ങളില്‍ പലരും ‘സ്ലീപ് അപ്നിയ’ എന്ന് കേട്ടുകാണും. വളരെ ഗൗരവമുള്ള ഒരു ഉറക്കപ്രശ്‌നമാണിത്. അടിസ്ഥാനപരമായി ശ്വാസഗതിയിലാണ് ഈ രോഗാവസ്ഥയില്‍ വ്യതിയാനം വരുന്നത്. ഉറങ്ങുമ്പോള്‍ ശ്വാസം നേരാംവണ്ണം എടുക്കാന്‍ കഴിയാത്ത സാഹചര്യവും ഇതുവഴി ഉറക്കം കൃത്യമാകാത്ത അവസ്ഥയുമുണ്ടാകുന്നു. ഇത്തരക്കാരില്‍ ഉറക്കത്തില്‍ വായിലൂടെ ശ്വാസമെടുക്കുന്നതിനാല്‍ കൂര്‍ക്കംവലിയും പതിവായിരിക്കും.
‘സ്ലീപ് അപ്നിയ’യും ഒരു നിശബ്ദഘാതകന്‍ തന്നെയാണ്. സ്‌ട്രോക്ക് (പക്ഷാഘാതം) പോലുള്ള പ്രശ്‌നങ്ങള്‍ മൂലം പെടുന്നനെ ഉറക്കത്തില്‍ മരണം സംഭവിക്കാനുള്ള സാധ്യതകള്‍ പോലും ഈ അവസ്ഥയിലുണ്ടാകാം. ഇതിന് സമയബന്ധിതമായ ചികിത്സ തേടുകയാണ് ഉചിതം.
ആറ്…
കരള്‍വീക്കം അഥവാ ‘ഫാറ്റി ലിവര്‍ ഡിസീസ്’ ആണ് മറ്റൊരു ‘സൈലന്റ് കില്ലര്‍’. രണ്ട് തരം കരള്‍വീക്കമുണ്ട്. ഒന്ന് മദ്യപാനം മൂലമുണ്ടാകുന്നതാണ്. അടുത്തത് പാരമ്പര്യം അടക്കം പല ഘടകങ്ങള്‍ മൂലമുണ്ടാകുന്നതും. രണ്ടിലും ആദ്യഘട്ടങ്ങളില്‍ ലക്ഷണങ്ങള്‍ പ്രകടമാകാതിരിക്കനാണ് സാധ്യതകളേറെയുള്ളത്.
ഇത് പിന്നീട് ‘ലിവര്‍ സിറോസിസ്’ എന്ന ഗുരുതരമായ അവസ്ഥയിലെത്തും വരെ തിരിച്ചറിയപ്പെടാതെ പോകാം. ലിവര്‍ സിറോസിസ് പ്രതിവര്‍ഷം നിരവധി ജീവനുകള്‍ അപഹരിക്കുന്നൊരു രോഗമാണ്. ആരോഗ്യകരമായ ജീവിതരീതി. മദ്യപാനം- പുകവലി പോലുള്ള ദുശ്ശീലങ്ങള്‍ ഉപേക്ഷിക്കുക എന്നിവയിലൂടെ ഒരു പരിധി വരെ കരള്‍വീക്കത്തെ നേരിടാം. കൃത്യമായ ഇടവേളകളില്‍ പരിശോധന നടത്തുന്നതിലൂടെയും കരള്‍വീക്കത്തെ കണ്ടെത്താന്‍ കഴിയുന്നതാണ്.