തിരുവനന്തപുരം: ശരീരാരോഗ്യം മെച്ചപ്പെടുത്താൻ സഹായിക്കുന്ന ലളിതമായ വ്യായാമങ്ങളിലൊന്നായ ഗ്ലൂട്ട് ബ്രിഡ്ജ് ഇപ്പോൾ കൂടുതൽ ശ്രദ്ധ നേടുന്നു. വീട്ടിൽ തന്നെ യാതൊരു ഉപകരണങ്ങളുമില്ലാതെ ചെയ്യാവുന്ന ഈ വ്യായാമം നിരവധി ആരോഗ്യ ഗുണങ്ങൾ നൽകുന്നുവെന്ന് വിദഗ്ധർ പറയുന്നു.
ഇടുപ്പിലെ പ്രധാന പേശിയായ ഗ്ലൂട്ടിയസ് മാക്സിമസിനെ ശക്തിപ്പെടുത്തുന്നതിൽ ഗ്ലൂട്ട് ബ്രിഡ്ജ് നിർണായക പങ്ക് വഹിക്കുന്നു. ഇതിലൂടെ ശരീരത്തിന് നല്ല ഷേപ്പും കരുത്തും ലഭിക്കും. കൂടാതെ നട്ടെല്ലിന്റെ താഴത്തെ ഭാഗത്തെ പിന്തുണയ്ക്കുന്ന പേശികൾ ശക്തമാകുന്നതിനാൽ പുറംവേദന കുറയ്ക്കാനും ഇത് സഹായകരമാണ്. ദീർഘനേരം ഇരുന്ന് ജോലി ചെയ്യുന്നവർക്കു ഈ വ്യായാമം ഏറെ ഗുണകരമാണ്.
ശരീരത്തിന്റെ മധ്യഭാഗത്തെ പേശികളെ ഉത്തേജിപ്പിക്കുന്നതിനാൽ ബാലൻസ്, സ്ഥിരത, വഴക്കം എന്നിവയും മെച്ചപ്പെടുന്നു. ഇടുപ്പിലെ പേശികൾ ശക്തമാകുന്നതോടെ കാൽമുട്ടുകൾക്ക് ലഭിക്കുന്ന സമ്മർദ്ദം കുറയുകയും സന്ധിവേദനകൾ ഒഴിവാക്കാനും സഹായിക്കും.
ഗ്ലൂട്ട് ബ്രിഡ്ജ് ചെയ്യുന്നതിനായി തറയിൽ മലർന്നു കിടന്ന് കാലുകൾ മടക്കി വയ്ക്കുക. തുടർന്ന് ശ്വാസം പുറത്തേക്ക് വിടുമ്പോൾ ഇടുപ്പ് മുകളിലേക്ക് ഉയർത്തി തോളും കാൽമുട്ടും ഒരേ നേരിയരേഖയിൽ വരുന്നതായി ഉറപ്പാക്കണം. മുകളിൽ എത്തിയപ്പോൾ പേശികൾ അല്പനേരം മുറുക്കി പിടിച്ച ശേഷം സാവധാനം താഴേക്ക് വരിക.
കൂടുതൽ ഫലം ലഭിക്കാൻ ആവശ്യാനുസരണം ഭാരം കൂട്ടിയും ഈ വ്യായാമം ചെയ്യാവുന്നതാണ്. ലളിതവും ഫലപ്രദവുമായ ഈ വ്യായാമം ദിനചര്യയിൽ ഉൾപ്പെടുത്തുന്നത് ആരോഗ്യത്തിനും ശരീരശക്തിക്കും ഗുണകരമാണെന്ന് വിദഗ്ധർ നിർദേശിക്കുന്നു.
