തിരുവനന്തപുരം: ലൈംഗിക ബന്ധത്തിനിടെ അനുഭവപ്പെടുന്ന വേദന (ഡൈസ്പാര്യൂണിയ) ഒരു സാധാരണ ആരോഗ്യപ്രശ്നമാണെന്ന് വിദഗ്ധർ മുന്നറിയിപ്പ് നൽകുന്നു. സ്ത്രീകളിലാണ് ഇത് കൂടുതലായി കണ്ടുവരുന്നതെങ്കിലും, പുരുഷന്മാർക്കും ചില സാഹചര്യങ്ങളിൽ ഈ പ്രശ്നം അനുഭവപ്പെടാം.
യോനിയിലെ വരൾച്ചയാണ് പ്രധാന കാരണങ്ങളിലൊന്ന്. മതിയായ ലൂബ്രിക്കേഷൻ ഇല്ലാത്തത് ഘർഷണം വർധിപ്പിക്കുകയും വേദനയ്ക്കിടയാക്കുകയും ചെയ്യുന്നു. ഹോർമോൺ മാറ്റങ്ങൾ, ഗർഭധാരണം, ആർത്തവവിരാമം തുടങ്ങിയ ഘടകങ്ങൾ ഇതിന് കാരണമാകാം.
അതുപോലെ, യീസ്റ്റ് അണുബാധ, ബാക്ടീരിയൽ വാഗിനോസിസ്, ലൈംഗികമായി പകരുന്ന രോഗങ്ങൾ (STIs) എന്നിവയും വേദനയ്ക്കിടയാക്കുന്ന പ്രധാന കാരണങ്ങളാണ്. ഇത്തരം അണുബാധകൾ മൂലം ചൊറിച്ചിലും നീറ്റലും അസ്വസ്ഥതയും അനുഭവപ്പെടാം.
മാനസിക ഘടകങ്ങളും ഈ പ്രശ്നത്തിൽ നിർണായകമാണ്. സമ്മർദ്ദം, ഉത്കണ്ഠ, മുൻകാല മോശം അനുഭവങ്ങൾ, പങ്കാളിയോടുള്ള മാനസിക അകലം എന്നിവ ശരീരത്തെ സ്വാഭാവികമായി ശാന്തമാകുന്നതിൽ തടസ്സമുണ്ടാക്കുകയും വേദനയ്ക്ക് കാരണമാവുകയും ചെയ്യാം.
കൂടാതെ പെൽവിക് ഇൻഫ്ലമേറ്ററി ഡിസീസ് (PID), എൻഡോമെട്രിയോസിസ്, ഗർഭാശയ മുഴകൾ, അണ്ഡാശയ സിസ്റ്റുകൾ തുടങ്ങിയ രോഗാവസ്ഥകളും അടിവയറ്റിൽ വേദന ഉണ്ടാക്കാൻ സാധ്യതയുണ്ട്. വജൈനിസ്മസ് എന്ന അവസ്ഥയിൽ യോനിയിലെ പേശികൾ സ്വമേധയാ ചുരുങ്ങുന്നതിലൂടെ ലൈംഗികബന്ധം ദുഷ്കരമാകുകയോ വേദനാജനകമാകുകയോ ചെയ്യുന്നു.
കോണ്ടം, ലൂബ്രിക്കന്റുകൾ, ശുചിത്വ ഉൽപ്പന്നങ്ങൾ എന്നിവയോട് ഉള്ള അലർജികളും ചിലരിൽ വേദനക്കും വീക്കത്തിനും കാരണമാകാം.
ലൈംഗിക ബന്ധത്തിനിടെ ആവർത്തിച്ചുള്ള വേദന അനുഭവപ്പെടുന്നവർ വൈകാതെ തന്നെ വൈദ്യോപദേശം തേടണമെന്ന് ആരോഗ്യവിദഗ്ധർ നിർദേശിക്കുന്നു. ശരിയായ ചികിത്സയും കൗൺസിലിംഗും വഴി ഈ പ്രശ്നം ഫലപ്രദമായി നിയന്ത്രിക്കാനാകും.
 ഒരു സാധാരണ ആരോഗ്യപ്രശ്നമാണെന്ന് വിദഗ്ധർ മുന്നറിയിപ്പ് നൽകുന്നു.){kind=link}