പുരുഷന്മാരിലെ ബീജങ്ങളുടെ അളവ് കുറയുന്നത് ഇന്ന് വ്യാപകമായി കണ്ടുവരുന്ന ആരോഗ്യപ്രശ്നമായി മാറുകയാണെന്ന് വിദഗ്ധർ മുന്നറിയിപ്പ് നൽകുന്നു. വിട്ടുമാറാത്ത സമ്മർദ്ദം, ഉറക്കക്കുറവ്, അമിതഭാരം, പുകവലി, അമിത മദ്യപാനം, വ്യായാമക്കുറവ് എന്നിവ ബീജ ഉൽപാദനത്തെ ഗണ്യമായി ബാധിക്കുന്ന പ്രധാന ഘടകങ്ങളാണ്.
Kailash IVFയിലെ ഐവിഎഫ് സ്പെഷ്യലിസ്റ്റ് ഡോ. മോണിക്ക ഗുപ്തയുടെ വിശദീകരണപ്രകാരം, പുരുഷന്മാരുടെ പ്രത്യുൽപാദനക്ഷമത സാധാരണയായി 20 മുതൽ 35 വയസ്സ് വരെ ഉയർന്ന നിലയിൽ തുടരുകയും തുടർന്ന് ക്രമേണ കുറയാൻ തുടങ്ങുകയും ചെയ്യുന്നു. 35 വയസിന് ശേഷം ബീജങ്ങളുടെ എണ്ണം, ചലനശേഷി, ഗുണനിലവാരം എന്നിവയിൽ ഇടിവ് സംഭവിക്കാമെന്നും ഡിഎൻഎ കേടുപാടുകളുടെ സാധ്യതയും വർധിക്കാമെന്നും അവർ ചൂണ്ടിക്കാട്ടുന്നു.
മലിനീകരണം, ഉയർന്ന താപനിലയിലുള്ള സാഹചര്യങ്ങൾ, സ്റ്റിറോയിഡ് ഉപയോഗം, അണുബാധകൾ എന്നിവയും ബീജത്തിന്റെ ആരോഗ്യത്തെ ബാധിക്കുന്ന ഘടകങ്ങളാണ്. പ്രത്യേകിച്ച് അശുദ്ധമായ വായു ശ്വസിക്കുന്നത് രക്തത്തിലെ ഹാനികര ഘടകങ്ങളുടെ അളവ് വർധിപ്പിച്ച് ബീജസംഖ്യ കുറയാൻ ഇടയാക്കുമെന്നാണ് പുതിയ പഠനങ്ങൾ വ്യക്തമാക്കുന്നത്.
ഭക്ഷണശീലങ്ങളും പുരുഷവന്ധ്യതയിൽ നിർണായക പങ്കുവഹിക്കുന്നു. പിസ, ബർഗർ, പ്രോസസ്ഡ് ഫുഡ് തുടങ്ങിയ ജങ്ക് ഫുഡുകളുടെ അമിത ഉപയോഗം ബീജങ്ങളുടെ അളവും ഗുണനിലവാരവും കുറയ്ക്കുന്നതായി പഠനങ്ങൾ പറയുന്നു. പാശ്ചാത്യ ഭക്ഷണരീതികൾ പിന്തുടരുന്ന യുവാക്കളിൽ ഈ പ്രശ്നം കൂടുതലായി കണ്ടുവരുന്നതായും വിദഗ്ധർ മുന്നറിയിപ്പ് നൽകുന്നു.
പ്രായം ഒരു ഘടകമാകുന്നതിന് മുമ്പ് തന്നെ ജീവിതശൈലി മൂലമുള്ള പ്രശ്നങ്ങൾ യുവാക്കളിൽ വർധിക്കുന്നത് ആശങ്കയാണെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു. ആരോഗ്യകരമായ ഭക്ഷണക്രമം, മതിയായ ഉറക്കം, സ്ഥിരമായ വ്യായാമം, പുകവലിയും മദ്യപാനവും ഒഴിവാക്കൽ എന്നിവ പുരുഷന്മാരുടെ പ്രത്യുൽപാദനക്ഷമത മെച്ചപ്പെടുത്താൻ സഹായിക്കുമെന്ന് വിദഗ്ധർ നിർദേശിക്കുന്നു.
