ഫോൺ ഉപയോഗം കഴിഞ്ഞാൽ നമ്മളിൽ പലരും അത് മേശപ്പുറത്തോ മറ്റ് പ്രതലങ്ങളിലോ വെക്കാറുണ്ട്. എന്നാൽ ഫോൺ സ്ക്രീൻ മുകളിലേക്ക് വെക്കുന്നതാണോ അതോ കമിഴ്ത്തി വെക്കുന്നതാണോ സുരക്ഷിതം എന്ന കാര്യത്തിൽ പലർക്കും സംശയമുണ്ട്. ഇന്നത്തെ സ്മാർട്ട്ഫോണുകളുടെയെല്ലാം ക്യാമറ മൊഡ്യൂളുകൾ ബോഡിയിൽ നിന്ന് അല്പം തള്ളിനിൽക്കുന്നതായതുകൊണ്ട് തന്നെ, ഫോൺ എങ്ങനെ വെക്കുന്നു എന്നത് അതിന്റെ സുരക്ഷയെ നേരിട്ട് ബാധിക്കുന്ന ഒന്നാണ്.
സാധാരണയായി ഫോൺ കുറച്ചുസമയം വെക്കുകയാണെങ്കിൽ സ്ക്രീൻ മുകളിലേക്ക് വരുന്ന രീതിയിൽ വെക്കുന്നതാണ് കൂടുതൽ സുരക്ഷിതം. ഇങ്ങനെ ചെയ്യുമ്പോൾ ക്യാമറ ഭാഗം മേശപ്പുറത്ത് നേരിട്ട് ഉരസാനുള്ള സാധ്യത ഒഴിവാക്കാം. എങ്കിലും മേശപ്പുറത്ത് പൊടിയോ ചെറിയ കണികകളോ ഉണ്ടെങ്കിൽ ഫോണിന്റെ പിൻഭാഗത്തിന് പോറലുകൾ വീഴാൻ ഇടയുണ്ട്. മറുവശത്ത്, അറിയിപ്പുകൾ കാണാതിരിക്കാനും സ്വകാര്യതയ്ക്കൂമായി ചിലർ ഫോൺ കമിഴ്ത്തിവെക്കാറുണ്ട്. എന്നാൽ തള്ളിനിൽക്കുന്ന ക്യാമറ ഗ്ലാസ് പ്രതലത്തിൽ നേരിട്ട് തട്ടുന്നത് ലെൻസിൽ പോറലുകൾ വീഴാൻ കാരണമാകും.
ഒരുതവണ കമിഴ്ത്തിവെച്ചതുകൊണ്ട് ക്യാമറയ്ക്ക് പെട്ടെന്ന് കേടുപാടുകൾ വരില്ലെങ്കിലും, ദിനംപ്രതി പരുക്കനായ പ്രതലങ്ങളിൽ ഇത്തരത്തിൽ വെക്കുന്നത് ലെൻസിന്റെ വ്യക്തതയെ ബാധിച്ചേക്കാം. ഈ പ്രശ്നം ഒഴിവാക്കാൻ ക്യാമറ ലെൻസിന് ചുറ്റും അല്പം ഉയർന്നുനിൽക്കുന്ന ഗുണനിലവാരമുള്ള ബാക്ക് കവറുകൾ ഉപയോഗിക്കുന്നത് നല്ലതാണ്. അതുപോലെ കിടക്കകളിലോ സോഫകളിലോ ഫോൺ വെക്കുമ്പോഴും അവിടെയുള്ള അഴുക്കോ പൊടിയോ ക്യാമറയെ ബാധിക്കാതെ സൂക്ഷിക്കാൻ പ്രത്യേകം ശ്രദ്ധിക്കേണ്ടതുണ്ട്.
ഫോൺ കൈകാര്യം ചെയ്യുമ്പോഴും ചില കാര്യങ്ങൾ ഓർമ്മിക്കേണ്ടതുണ്ട്. ഫോൺ എടുക്കുമ്പോഴും പിടിക്കുമ്പോഴും വിരലുകൾ ക്യാമറ ലെൻസിൽ പതിവായി പടരുന്നത് ഒഴിവാക്കണം. വിരലിലെ എണ്ണമയവും അഴുക്കും ക്യാമറ ഗ്ലാസിൽ പറ്റിപ്പിടിച്ച് ചിത്രങ്ങളുടെ വ്യക്തത കുറയാൻ ഇത് കാരണമാകും. ക്യാമറയിൽ അഴുക്ക് കണ്ടാൽ പരുക്കൻ തുണികൾ ഉപയോഗിച്ച് തുടയ്ക്കാതെ, മൃദുവായ മൈക്രോഫൈബർ തുണി ഉപയോഗിച്ച് സാവധാനം വൃത്തിയാക്കുന്നതാണ് ഫോണിന്റെ ആയുസ്സ് വർദ്ധിപ്പിക്കാൻ ഏറ്റവും അനുയോജ്യമായ വഴി.
