മനുഷ്യശരീരത്തിലെ ഏറ്റവും പ്രധാനപ്പെട്ട അവയവങ്ങളിലൊന്നാണ് ഹൃദയം. ഹൃദയത്തിന്റെ പ്രവർത്തനം നിയന്ത്രിക്കുന്നത് തലച്ചോറാണെന്നത് നമുക്കെല്ലാം അറിയാം. എന്നാൽ സ്വയം നിയന്ത്രിക്കാൻ ഹൃദയത്തിനെ പ്രാപ്തമാക്കുന്ന വിധത്തിൽ ഒരു സങ്കീർണ നാഡീവ്യൂഹം പ്രവർത്തിക്കുന്നുണ്ടെന്ന് കണ്ടെത്തിയിരിക്കുകയാണ് ശാസ്ത്രലോകം. ‘ഹൃദയത്തിനുള്ളിലെ കുഞ്ഞു തലച്ചോർ’ എന്ന വിശേഷണത്തിന് കരുത്തേകുന്ന ഈ കണ്ടെത്തൽ, ഹൃദയമിടുപ്പ് എങ്ങനെ നിയന്ത്രിക്കപ്പെടുന്നു എന്നതിനെക്കുറിച്ചുള്ള നിലവിലെ ധാരണകളെത്തന്നെ മാറ്റിമറിച്ചേക്കാം.
എന്താണ് പുതിയ കണ്ടെത്തൽ?
ഹൃദയഭിത്തിയുടെ പുറംപാളികളിലുള്ള ഈ നാഡീശൃംഖല തലച്ചോറിൽനിന്നുളള സന്ദേശങ്ങൾ കൈമാറുന്ന ലളിതമായ സംവിധാനമാണെന്നായിരുന്നു ധാരണ. എന്നാൽ, പുതിയ പഠനമനുസരിച്ച് ഇവ അതിലും സങ്കീർണവും സ്വതന്ത്രമായ നിയന്ത്രണശേഷിയുള്ളതുമാണെന്ന് വ്യക്തമാകുന്നു. ആയിരക്കണക്കിന് നാഡീകോശങ്ങൾ അടങ്ങിയ ഈ നാഡീവ്യൂഹം ഹൃദയമിടുപ്പിന്റെ വേഗം, താളം, രക്തപ്രവാഹം എന്നിവ നിയന്ത്രിക്കുന്നതിൽ നിർണായക പങ്കുവഹിക്കുന്നുണ്ടെന്നാണ് കണ്ടെത്തൽ.
തലച്ചോറിൽനിന്ന് ലഭിക്കുന്ന സന്ദേശങ്ങൾ അനുസരിക്കുക മാത്രമല്ല, പ്രാദേശിക സാഹചര്യങ്ങൾ വിലയിരുത്തി സ്വതന്ത്രമായി തീരുമാനങ്ങൾ എടുക്കാനും ഈ നാഡീശൃംഖലയ്ക്ക് കഴിവുണ്ടെന്നാണ് ഗവേഷകർ പറയുന്നത്. അതായത്, സ്വന്തം പ്രവർത്തനങ്ങളെ സൂക്ഷ്മമായി ഏകോപിപ്പിക്കാൻ കഴിയുന്ന ബുദ്ധിപരമായ ഒരു നിയന്ത്രണസംവിധാനവും അതിനുണ്ട്. എന്നാൽ, ഇത് മനുഷ്യന്റെ ചിന്ത, ഓർമ്മ, വികാരങ്ങൾ എന്നിവ നിയന്ത്രിക്കുന്ന തലച്ചോറിന് പകരമാണെന്ന അർത്ഥമില്ല.
ആരാണ് കണ്ടെത്തിയത്?
സ്വീഡനിലെ കരോലിൻസ ഇൻസ്റ്റിറ്റ്യൂട്ടും അമേരിക്കയിലെ കൊളംബിയ സർവകലാശാലയും ചേർന്ന് നടത്തിയ പഠനമാണ് ഈ കണ്ടെത്തലിന് പിന്നിൽ. നേച്ചർ കമ്മ്യൂണിക്കേഷൻ ജേർണലിൽ പ്രസിദ്ധീകരിച്ച പഠനത്തിൽ ഇക്കാര്യത്തെക്കുറിച്ച് വ്യക്തമായി പറയുന്നുണ്ട്. കരോലിൻസ്ക ഇൻസ്റ്റിറ്റ്യൂട്ടിലെ ന്യൂറോസയൻസ് വിഭാഗത്തിലെ ഗവേഷകനായ കോൺസ്റ്റാന്റിനോസ് അംപാറ്റ്സിസ് പറയുന്നതനുസരിച്ച് ഹൃദയത്തിന്റെ ഈ ചെറിയ തലച്ചോറ് ഹൃദയത്തിന്റെ താളം നിയന്ത്രിക്കുന്നതിലും നിലനിർത്തുന്നതിലും നിർണായക പങ്ക് വഹിക്കുന്നുണ്ട്.വ്യത്യസ്തങ്ങളായ ചുമതലകൾ നിർവഹിക്കുന്ന വിവിധതരം ന്യൂറോണുകളെ ഗവേഷകർ തിരിച്ചറിഞ്ഞിട്ടുണ്ട്. അവയിൽ ഹൃദയമിടിപ്പിന്റെ താളം ആരംഭിക്കാൻ സഹായിക്കുന്ന പേസ്മേക്കർ സ്വഭാവമുള്ള ന്യൂറോണുകളുടെ ഒരു ചെറിയ വിഭാഗവും ഉൾപ്പെടുന്നു. നിലവിലെ ശാസ്ത്രീയ ധാരണകളെ ചോദ്യം ചെയ്യുന്നതാണ് പുതിയ കണ്ടെത്തൽ.
എങ്ങനെയാണ് കണ്ടെത്തിയത്?
സീബ്രാഫിഷ് എന്ന മത്സ്യത്തെ ഉപയോഗിച്ചാണ് ഈ പഠനം നടത്തിയത്. ഹൃദയമിടിപ്പിന്റെയും ഹൃദയത്തിന്റെ പ്രവർത്തനരീതിയുടെയും കാര്യത്തിൽ സീബ്രാഫിഷിന് മനുഷ്യഹൃദയവുമായി നിരവധി സാമ്യങ്ങൾ ഉള്ളതിനാലാണ് സീബ്രാഫിഷിനെ പഠനത്തിനായി തിരഞ്ഞെടുത്തത്. സിംഗിൾ-സെൽ ആർഎൻഎ സീക്വൻസിങ്, അനാട്ടമിക്കൽ പഠനങ്ങൾ, ഇലക്ട്രോഫിസിയോളജിക്കൽ സാങ്കേതിക വിദ്യകൾ എന്നിവ ഉപയോഗിച്ചാണ് ഹൃദയത്തിലെ ന്യൂറോണുകളുടെ ഘടനയും പ്രവർത്തനവും ഗവേഷകർ മാപ് ചെയ്തത്.
കണ്ടെത്തലിന്റെ പ്രാധാന്യം?
വ്യായാമം, മാനസിക സമ്മർദം തുടങ്ങിയ സാഹചര്യങ്ങളിൽ ഹൃദയത്തിലെ ഈ നാഡീവ്യൂഹം തലച്ചോറുമായി എങ്ങനെയാണ് ഇടപെടുന്നതെന്ന് കണ്ടെത്താനായി കൂടുതൽ പഠനങ്ങൾ നടത്താനാണ് ഗവേഷകരുടെ പദ്ധതി. ഭാവിയിൽ ഹൃദയമിടുപ്പിലെ താളപ്പിഴകൾ, ഹൃദയാഘാതത്തിന് ശേഷമുള്ള പ്രവർത്തന പ്രശ്നങ്ങൾ തുടങ്ങിയവ കൂടുതൽ കൃത്യമായി മനസിലാക്കാനും പുതിയ ചികിത്സാരീതികൾ വികസിപ്പിക്കാനും ഈ പഠനം വഴിയൊരുക്കുമെന്നാണ് ഗവേഷകരുടെ പ്രതീക്ഷ.
