സാധാരണയായി ലിപിഡ് പ്രൊഫൈൽ ടെസ്റ്റ് ഫലം നോർമൽ ആണെന്ന് കാണുമ്പോൾ നമ്മളിൽ ഭൂരിഭാഗം പേരും ആശ്വസിക്കാറുണ്ട്. ഹൃദയത്തിന് യാതൊരു കുഴപ്പവുമില്ലെന്നാണ് നമ്മുടെ ധാരണ. എന്നാൽ, കൊളസ്ട്രോൾ നില മാത്രം നോക്കി ഹൃദയാരോഗ്യം സുരക്ഷിതമാണെന്ന് ഉറപ്പിച്ചു പറയാനാകില്ലെന്ന് മുന്നറിയിപ്പ് നൽകുകയാണ് വിദഗ്ധർ. സാധാരണ രക്തപരിശോധനകളിൽ കാണാത്ത ചില വില്ലന്മാർ നിങ്ങളുടെ ഹൃദയധമനികളിൽ ഒളിച്ചിരിപ്പുണ്ടാകാം.
25 വർഷത്തിലധികം പ്രവൃത്തിപരിചയമുള്ള പ്രമുഖ കാർഡിയോതൊറാസിക് സർജൻ ഡോ.ജെറമി ലണ്ടൻ ആണ് ഇതിന് പിന്നിലെ ശാസ്ത്രീയ വശം വിശദീകരിക്കുന്നത്. ഇൻസ്റ്റഗ്രാമിലൂടെ പങ്കുവെച്ച ഒരു വീഡിയോയിൽ അദ്ദേഹം, സാധാരണ കൊളസ്ട്രോൾ ടെസ്റ്റിൽ അളക്കുന്ന LDL-C, അതിലും കൃത്യമായ ഫലം നൽകുന്ന ApoBnഎന്നിവ തമ്മിലുള്ള വ്യത്യാസങ്ങളെക്കുറിച്ച് വ്യക്തമാക്കുന്നു.
എന്താണ് LDL-C, ApoB എന്നിവ തമ്മിലുള്ള വ്യത്യാസം?
നമ്മുടെ ശരീരത്തിലെ ചീത്ത കൊളസ്ട്രോളിന്റെ ആകെ അളവാണ് LDL-C പരിശോധനയിലൂടെ കണ്ടെത്തുന്നത്. എന്നാൽ ഈ കൊളസ്ട്രോളിനെ ചുമന്നുകൊണ്ട് രക്തത്തിലൂടെ സഞ്ചരിക്കുന്ന കണികകളുടെ എണ്ണം കൃത്യമായി മനസിലാക്കാൻ ഇതിലൂടെ സാധിക്കില്ല. ഇവിടെയാണ് ApoB പരിശോധനയുടെ പ്രാധാന്യം.
ഹൃദയാഘാതത്തിന് കാരണമാകുന്ന, അല്ലെങ്കിൽ ധമനികളിൽ അടിഞ്ഞുകൂടുന്ന എല്ലാ കൊളസ്ട്രോൾ കണികകളിലും കൃത്യം ഒരു ‘ApoB’ പ്രോട്ടീൻ തന്മാത്ര അടങ്ങിയിരിക്കും. അതിനാൽ, രക്തത്തിൽ എത്രമാത്രം അപകടകാരികളായ കണികകൾ ഉണ്ടെന്ന് നേരിട്ട് എണ്ണി തിട്ടപ്പെടുത്താൻ ApoB ടെസ്റ്റിലൂടെ സാധിക്കും.
‘ഹൈവേയിലെ ട്രക്കുകൾ’ – ഡോക്ടറുടെ ലളിതമായ ഉദാഹരണം
വിഷയം എല്ലാവർക്കും എളുപ്പത്തിൽ മനസിലാകാൻ ഡോ. ജെറമി ഒരു ട്രക്ക് ഉദാഹരണം പറഞ്ഞിട്ടുണ്ട്. “ചീത്ത കൊളസ്ട്രോൾ കണികകളെ ഒരു ഹൈവേയിലൂടെ പോകുന്ന ട്രക്കുകളായി സങ്കൽപ്പിക്കുക. ഇതിൽ LDL-C എന്നത് ആ ട്രക്കുകളിൽ കയറ്റിയിരിക്കുന്ന ചരക്കിന്റെ ആകെ തൂക്കമാണ്. എന്നാൽ ApoB എന്നത് ആ റോഡിലൂടെ ഓടുന്ന ട്രക്കുകളുടെ എണ്ണമാണ്. ഒരേ തൂക്കമുള്ള ചരക്ക് കുറച്ചു വലിയ ട്രക്കുകളിലോ അല്ലെങ്കിൽ നിരവധി ചെറിയ ട്രക്കുകളിലോ കയറ്റി അയക്കാം.
ചില ആളുകളിൽ LDL-C സാധാരണ നിലയിലായിരിക്കും, എന്നാൽ അവരുടെ രക്തത്തിൽ ചരക്ക് കുറഞ്ഞ ഒട്ടനവധി ചെറിയ ട്രക്കുകൾ ഉണ്ടായിരിക്കും. ഇവിടെ വില്ലനാകുന്നത് ട്രക്കുകളുടെ എണ്ണമാണ്. കാരണം ഓരോ ട്രക്കും ധമനികളുടെ ഭിത്തി തുളച്ചുകയറി കൊഴുപ്പ് അടിഞ്ഞുകൂടാൻ കാരണമായേക്കാവുന്ന ഒരു അപകടസാധ്യതയാണ്.”
കൊളസ്ട്രോൾ നില നോർമലാണെങ്കിലും ചിലർക്ക് ഹൃദയാഘാതം ഉണ്ടാകുന്നത് ഇതുകൊണ്ടാണ്. കാരണം അവരുടെ ശരീരത്തിൽ ചീത്ത കൊളസ്ട്രോളിന്റെ അളവ് കുറവാണെങ്കിലും, അവയെ വഹിക്കുന്ന കണികകളുടെ എണ്ണം വളരെ കൂടുതലായിരിക്കും.
ApoB ടെസ്റ്റ് ചെയ്യേണ്ടത് ആർക്കൊക്കെ?
പഠനങ്ങൾ പ്രകാരം ഹൃദ്രോഗ സാധ്യത മുൻകൂട്ടി പ്രവചിക്കാൻ LDL-C യേക്കാൾ കൃത്യത ApoB പരിശോധനയ്ക്കാണ്. പ്രത്യേകിച്ച് താഴെ പറയുന്ന വിഭാഗങ്ങളിൽ പെട്ടവർ ഇത് നിർബന്ധമായും ശ്രദ്ധിക്കണം:
- മെറ്റബോളിക് സിൻഡ്രോം ഉള്ളവർ
- ഇൻസുലിൻ റെസിസ്റ്റൻസ് അല്ലെങ്കിൽ പ്രമേഹമുള്ളവർ
- ട്രൈഗ്ലിസറൈഡുകളുടെ അളവ് രക്തത്തിൽ കൂടുതലുള്ളവർ
ഈ ആരോഗ്യവസ്തുത കണക്കിലെടുത്ത് അമേരിക്കൻ ഹാർട്ട് അസോസിയേഷൻ തങ്ങളുടെ പുതിയ മാർഗനിർദ്ദേശങ്ങളിൽ ApoB പരിശോധനയും ഉൾപ്പെടുത്തിയിട്ടുണ്ട്.
