ഇന്നത്തെ തിരക്കേറിയ ജീവിതശൈലിയിൽ ഉറക്കത്തെ പലരും അവഗണിക്കുന്ന പ്രവണത വർധിക്കുകയാണ്. രാത്രി വൈകിയും ജോലി ചെയ്യുകയോ പഠിക്കുകയോ ചെയ്യുന്നത് സാധാരണമായിക്കഴിഞ്ഞെങ്കിലും, വെറും ഒരു മണിക്കൂർ ഉറക്കക്കുറവ് പോലും ഹൃദയാരോഗ്യത്തെയും തീരുമാനമെടുക്കാനുള്ള ശേഷിയെയും ഗൗരവമായി ബാധിക്കാമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.
Dr. Vijay Vendra Prakashയുടെ വിശദീകരണമനുസരിച്ച്, ദിവസവും എട്ട് മണിക്കൂർ ഗുണമേന്മയുള്ള ഉറക്കം ശരീരത്തിനും മസ്തിഷ്കത്തിനും അത്യാവശ്യമാണ്. ‘ഡേലൈറ്റ് സേവിങ് ടൈം’ പോലുള്ള സമയമാറ്റങ്ങൾ പോലും മനുഷ്യന്റെ സ്വാഭാവിക ഉറക്കചക്രത്തെ താളം തെറ്റിക്കുകയും ആരോഗ്യപ്രശ്നങ്ങൾ വർധിപ്പിക്കുകയും ചെയ്യുന്നു.
വർഷത്തിൽ രണ്ടുതവണ ചില രാജ്യങ്ങളിൽ നടപ്പാക്കുന്ന ഡേലൈറ്റ് സേവിങ് ടൈമിനിടെ ആളുകൾക്ക് ഒരു മണിക്കൂർ ഉറക്കം നഷ്ടപ്പെടുമ്പോൾ അതിന്റെ പ്രത്യാഘാതങ്ങൾ ഉടൻ പ്രകടമാകുന്നുവെന്ന് പഠനങ്ങൾ വ്യക്തമാക്കുന്നു. ഒരു മണിക്കൂർ ഉറക്കക്കുറവിന്റെ തൊട്ടടുത്ത ദിവസം ഹൃദയാഘാത സാധ്യത 24 ശതമാനം വരെ ഉയരുന്നതായും റോഡപകടങ്ങളും ജോലിസ്ഥല അപകടങ്ങളും വർധിക്കുന്നതായും റിപ്പോർട്ടുകളുണ്ട്.
ഉറക്കക്കുറവ് ശരീരത്തെ മാത്രമല്ല, മനുഷ്യന്റെ വിവേചനശേഷിയെയും ബാധിക്കുന്നു. തീരുമാനങ്ങൾ എടുക്കുന്നതിലും പ്രതികരണ വേഗത്തിലും ഉറക്കക്കുറവ് തിരിച്ചടി സൃഷ്ടിക്കുന്നു. മറുവശത്ത്, ഒരു മണിക്കൂർ അധിക ഉറക്കം ലഭിക്കുമ്പോൾ ഹൃദയാഘാത സാധ്യതയിൽ 21 ശതമാനം കുറവ് രേഖപ്പെടുത്തുന്നുവെന്നതാണ് ശ്രദ്ധേയം.
ആരോഗ്യ വിദഗ്ധരുടെ അഭിപ്രായത്തിൽ ഉറക്കം ഒരു ആഡംബരമല്ല, മറിച്ച് ആരോഗ്യകരമായ ജീവിതത്തിന്റെ അടിസ്ഥാന ഘടകമാണ്. ശരീരം സ്വയം പുതുക്കാനും കേടുപാടുകൾ പരിഹരിക്കാനും ആവശ്യമായ സമയം ഉറക്കമാണ് നൽകുന്നത്. അതിനാൽ തിരക്കുകൾക്കിടയിലും മതിയായ ഉറക്കം ഉറപ്പാക്കുന്നത് ആരോഗ്യസംരക്ഷണത്തിന് നിർണായകമാണെന്ന് വിദഗ്ധർ ഓർമ്മിപ്പിക്കുന്നു.
