ശരീരത്തിലെ മറ്റ് പേശികളെപ്പോലെ തന്നെ പെൽവിക് ഫ്ലോർ പേശികൾക്കും സ്ഥിരമായ വ്യായാമം ആവശ്യമാണ്. മൂത്രസഞ്ചി, കുടൽ, ലൈംഗിക അവയവങ്ങൾ എന്നിവയെ താങ്ങിനിർത്തുന്ന പ്രധാന പേശികളാണ് ഇവ. ഈ പേശികളെ ശക്തിപ്പെടുത്താൻ സഹായിക്കുന്ന ഏറ്റവും ലളിതവും ഫലപ്രദവുമായ മാർഗമാണ് കെഗൽ വ്യായാമങ്ങൾ.
പുരുഷന്മാരിലും സ്ത്രീകളിലും വ്യത്യസ്തമായ ആരോഗ്യഗുണങ്ങൾ കെഗൽ വ്യായാമം നൽകുന്നു. പുരുഷന്മാരിൽ ലിംഗോദ്ധാരണ പ്രശ്നങ്ങൾ കുറയ്ക്കാനും ശീഘ്രസ്ഖലനം നിയന്ത്രിക്കാനും ഇത് സഹായിക്കും. കൂടാതെ മൂത്രം അറിയാതെ പോകുന്ന അവസ്ഥ തടയാനും പെൽവിക് പേശികളുടെ ശക്തി വർധിപ്പിക്കാനും ഇത് ഉപകരിക്കുന്നു.
സ്ത്രീകളിൽ പ്രസവാനന്തരം യോനീപേശികളുടെ ഇലാസ്തികത വർധിപ്പിക്കാനും ലൈംഗിക ബന്ധത്തിൽ കൂടുതൽ സംവേദനക്ഷമതയും സംതൃപ്തിയും നൽകാനും കെഗൽ വ്യായാമങ്ങൾ സഹായിക്കുന്നു. ആർത്തവവിരാമത്തിന് ശേഷമുള്ള ചില ശാരീരിക അസ്വസ്ഥതകൾ കുറയ്ക്കാനും ഇത് പ്രയോജനപ്പെടുന്നു.
ഈ വ്യായാമം ചെയ്യാൻ പ്രത്യേക ഉപകരണങ്ങളൊന്നും ആവശ്യമില്ല. ആദ്യം പെൽവിക് പേശികളെ തിരിച്ചറിയണം. മൂത്രം ഒഴിക്കുമ്പോൾ ഇടയ്ക്ക് നിർത്താൻ ശ്രമിക്കുമ്പോൾ ഉപയോഗിക്കുന്ന പേശികളാണ് ഇവ. പിന്നീട് ആ പേശികളെ 3 മുതൽ 5 സെക്കൻഡ് വരെ മുറുക്കി പിടിച്ച് അതേ സമയം മുഴുവൻ ശ്വാസോച്ഛ്വാസം സാധാരണ നിലയിൽ തുടരുക. തുടർന്ന് 3 മുതൽ 5 സെക്കൻഡ് വരെ പൂർണ്ണമായി അയച്ചുവിടുക.
ഇങ്ങനെ പത്ത് തവണ ആവർത്തിക്കുന്നത് ഒരു സെറ്റായി കണക്കാക്കാം. ദിവസവും മൂന്ന് തവണ ഇത് ചെയ്യുന്നത് മികച്ച ഫലം നൽകും. കുറഞ്ഞത് നാല് മുതൽ ആറാഴ്ച വരെ തുടർച്ചയായി ചെയ്യുമ്പോഴാണ് വ്യക്തമായ മാറ്റം അനുഭവപ്പെടുക.
ലൈംഗികാരോഗ്യം മെച്ചപ്പെടുത്താനും ആത്മവിശ്വാസം വർധിപ്പിക്കാനും സഹായിക്കുന്ന ഈ ലളിതമായ വ്യായാമം ഇന്ന് തന്നെ ജീവിതശൈലിയിലെ ഭാഗമാക്കാം.
