ആരോഗ്യകരമായ ജീവിതത്തിനാവശ്യമായ നിർണായക അവയവങ്ങളിലൊന്നാണ് വൃക്കകൾ. രക്തത്തിൽ നിന്നുള്ള മാലിന്യങ്ങൾ ഫിൽട്ടർ ചെയ്യുക, ശരീരത്തിലെ ദ്രാവക സന്തുലിതാവസ്ഥ നിലനിർത്തുക, രക്തസമ്മർദ്ദം നിയന്ത്രിക്കുക, എല്ലുകളുടെയും രക്തക്കുഴലുകളുടെയും ആരോഗ്യം സംരക്ഷിക്കുക തുടങ്ങി നിരവധി പ്രധാന പ്രവർത്തനങ്ങൾ വൃക്കകൾ നിർവഹിക്കുന്നു.
എന്നാൽ വൃക്കകൾക്ക് കേടുപാടുകൾ സംഭവിക്കുമ്പോൾ പ്രാരംഭ ഘട്ടത്തിൽ വ്യക്തമായ ലക്ഷണങ്ങൾ കാണിക്കാത്തതാണ് ആശങ്കാജനകം. അതുകൊണ്ടുതന്നെ വിട്ടുമാറാത്ത വൃക്കരോഗത്തെ ‘നിശബ്ദ കൊലയാളി’ എന്നാണു വിദഗ്ധർ വിശേഷിപ്പിക്കുന്നത്.
മെഡിക്കൽ ജേണലായ The Lancet ൽ പ്രസിദ്ധീകരിച്ച പുതിയ പഠനങ്ങൾ പ്രകാരം, ലോകമെമ്പാടുമുള്ള 788 മുതൽ 844 ദശലക്ഷം വരെ മുതിർന്നവർ വൃക്കരോഗങ്ങളാൽ ബുദ്ധിമുട്ടുന്നുണ്ട്. 2040 ഓടെ വൃക്കരോഗം ലോകത്തിലെ മരണകാരണങ്ങളിൽ അഞ്ചാം സ്ഥാനത്തെത്താൻ സാധ്യതയുണ്ടെന്നും പഠനങ്ങൾ മുന്നറിയിപ്പ് നൽകുന്നു.
Chronic Kidney Disease വർധിക്കാൻ പ്രധാന കാരണങ്ങളായി Type 2 Diabetes, ഉയർന്ന രക്തസമ്മർദ്ദം, പൊണ്ണത്തടി, ഹൃദ്രോഗങ്ങൾ, വാർധക്യം എന്നിവ ചൂണ്ടിക്കാട്ടപ്പെടുന്നു. കൂടാതെ ക്രമരഹിതമായ ജീവിതശൈലിയും മോശം ഭക്ഷണക്രമവും വൃക്കകളിൽ അധിക സമ്മർദ്ദം സൃഷ്ടിക്കുന്നു.
വൃക്കരോഗം നേരത്തെ കണ്ടെത്തുന്നത് ചികിത്സയിൽ നിർണായകമാണ്. ഗ്ലോമെറുലാർ ഫിൽട്രേഷൻ റേറ്റ് (GFR) ടെസ്റ്റ്, ആൽബുമിനൂരിയ പരിശോധന, ആധുനിക ഇമേജിംഗ് സംവിധാനങ്ങൾ, ആർട്ടിഫിഷ്യൽ ഇന്റലിജൻസ് തുടങ്ങിയ സാങ്കേതികവിദ്യകൾ രോഗം പ്രാരംഭ ഘട്ടത്തിൽ കണ്ടെത്താൻ സഹായിക്കുന്നു.
വിദഗ്ധരുടെ അഭിപ്രായത്തിൽ ഉയർന്ന പ്രോട്ടീൻ ഭക്ഷണക്രമം, അമിത ഉപ്പ്, പഞ്ചസാര, അനാരോഗ്യകരമായ കൊഴുപ്പ് എന്നിവയുടെ അമിത ഉപയോഗം വൃക്കകളെ പ്രതികൂലമായി ബാധിക്കും. കൈകളിലോ കാലുകളിലോ കണ്ണിനുചുറ്റുമോ വീക്കം, മൂത്രത്തിലെ മാറ്റങ്ങൾ, നുരയോടുകൂടിയ മൂത്രം, സ്ഥിരമായ ക്ഷീണം, വിശപ്പില്ലായ്മ, വായിൽ ലോഹ രുചി, രാത്രിയിലെ പേശിവലിവ് തുടങ്ങിയ ലക്ഷണങ്ങൾ അവഗണിക്കരുതെന്നും അവർ മുന്നറിയിപ്പ് നൽകുന്നു.
പുതിയ ചികിത്സാരീതികളും മരുന്നുകളും വൃക്കരോഗത്തിന്റെ പുരോഗതി മന്ദഗതിയിലാക്കുന്നതിൽ പ്രതീക്ഷ നൽകുന്നുണ്ടെങ്കിലും, സമയബന്ധിതമായ രോഗനിർണയവും ആരോഗ്യകരമായ ജീവിതശൈലിയും തന്നെയാണ് ഏറ്റവും മികച്ച പ്രതിരോധമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.
