ജീവിതത്തിലെ പലതരത്തിലുള്ള തിരക്കുകള്ക്കിടയില് സ്വന്തം ആരോഗ്യം പോലും ശ്രദ്ധിക്കാന് സമയം കിട്ടാത്ത ധാരാളം പേരുണ്ട്. രോഗം വഷളായി ചികിത്സിച്ചാലും ഭേദമാകാത്ത അവസ്ഥയിലായിരിക്കും ഒടുവില് അവ കണ്ടെത്തുന്നതും. എന്നാല് ശരീരത്തിലെ ചില മാറ്റങ്ങള് ശ്രദ്ധിക്കുന്നത് കാന്സര് പോലെയുള്ള മാരക രോഗങ്ങള് തുടക്കത്തിലെ കണ്ടെത്താനും ചികിത്സ കൂടുതല് ഫലപ്രദമാക്കാനും സഹായിക്കുമെന്ന് ആരോഗ്യവിദഗ്ധര് വ്യക്തമാക്കുന്നു.
കാന്സര്, ലിവര്, കിഡ്നി രോഗങ്ങള് പോലുളള പലതിനും തുടക്കത്തില് ലക്ഷണങ്ങള് വ്യക്തമാകാത്തതിനാല് ഇതുമായി ബന്ധപ്പെട്ട രോഗ ലക്ഷണങ്ങള് പലതും പ്രായമാകുന്നതിന്റെയോ, ജോലിഭാരത്തിന്റെയോ, മാനസിക സമ്മര്ദ്ദത്തിന്റെയോ ഭാഗമായി ഉണ്ടാകുന്നതാണെന്ന് ആളുകള് സ്വയം കരുതുന്നു. ആരോഗ്യ വിദഗ്ധരുടെ അഭിപ്രായത്തില് അടിയന്തിരമായി ശ്രദ്ധിക്കേണ്ട ചില ആരോഗ്യ ലക്ഷണങ്ങളുണ്ട്.
അകാരണമായി ശരീരഭാരം കുറയുക
ഭക്ഷണത്തിലോ വ്യായാമത്തിലോ പ്രത്യേകിച്ച് മാറ്റങ്ങളൊന്നും വരുത്താതെതന്നെ ശരീരഭാരം പെട്ടെന്ന് കുറയുകയാണെങ്കില് അത് ശ്രദ്ധിക്കേണ്ട കാര്യമാണ്. ചുരുങ്ങിയ കാലയളവിനുള്ളില് നാലും അഞ്ചും കിലോയിലധികം ഭാരം കുറയുന്നത് പാന്ക്രിയാറ്റിക്, ശ്വാസകോശം, വയറ്, അന്നനാളം തുടങ്ങിയവയുമായി ബന്ധപ്പെട്ട കാന്സറുകളുടെ ലക്ഷണമാണെന്ന് കണക്കാക്കപ്പെടുന്നു.
വിട്ടുമാറാത്ത ചുമ, ശ്വാസകോശ സംബന്ധമായ പ്രശ്നങ്ങള്
പനി വന്ന ശേഷം അല്ലെങ്കില് വായൂ മലിനീകരണം മൂലം സാധാരണയായി ചുമ ഉണ്ടാകാറുണ്ട്. എന്നാല് അസുഖം ഭേദമായ ശേഷം 4 ആഴ്ചയില് കൂടുതല് ചുമ നീണ്ടുനില്ക്കുകയാണെങ്കില് അത് ശ്രദ്ധിക്കേണ്ട കാര്യമാണ്. സാധാരണ വൈറല് പനിയോടൊപ്പം വരുന്ന ചുമ രണ്ടാഴ്ചയ്ക്കുളളില് ഭേദമാകാറുണ്ട്. എന്നാല് വിട്ടുമാറാത്ത ചുമ ആസ്ത്മയോ ഗ്യാസ്ട്രോ ഈസോഫാഗല് റിഫ്ളക്സോ ആകാം. മാത്രമല്ല ചില സാഹചര്യങ്ങളില്ശ്വാസകോശത്തിലെയോതൊണ്ടയിലെയോ കാന്സറിന്റെ ആദ്യകാല ലക്ഷണമാകാനും സാധ്യതയുണ്ട്.
ക്ഷീണം, ഓര്മ്മക്കുറവ് മലശോധനയിലെ മാറ്റങ്ങള്
ആവശ്യത്തിന് വിശ്രമിച്ചാലും മാറാത്ത കഠിനമായ ക്ഷീണം കാന്സറിന്റെയും ഹൃദ്രോഗങ്ങളുടെയും പ്രാരംഭ ലക്ഷണങ്ങളില് ഒന്നാണ്. മലബന്ധം, വയറിളക്കം, മലത്തില് രക്തത്തിന്റെ അംശം കാണുക ഇവ സാധാരണയായി പൈല്സ് അല്ലെങ്കില് ഭക്ഷണത്തിലെ എന്തെങ്കിലും മാറ്റങ്ങള്കൊണ്ട് സംഭവിക്കുന്നതോ ആണെന്നായിരിക്കും സാധാരണയായി ആളുകള് വിശ്വസിക്കുന്നത്. എന്നാല് ഈ ലക്ഷണങ്ങള് വന്കുടല് കാന്സറിന്റേതാവാമെന്ന് ആരോഗ്യ വിദഗ്ധര് പറയുന്നു.
സംസാരിക്കുമ്പോള് വാക്കുകള് പെട്ടെന്ന് ഓര്ത്തെടുക്കാന് സാധിക്കാതെ വരിക, ഓര്മ്മക്കുറവ്, ശ്രദ്ധകേന്ദ്രീകരിക്കാന് സാധിക്കാതെ വരിക എന്നീ ലക്ഷണങ്ങള് ആഴ്ചകളോളം നീണ്ടുനിന്നാലും ഡോക്ടറെ കാണേണ്ടത് അത്യാവശ്യമാണ്. പല ലക്ഷണങ്ങളും കൂടുതല് കാലം നീണ്ടുനില്ക്കുന്നുണ്ടെങ്കില് ഡോക്ടറുടെ സേവനം തേടേണ്ടതാണ്
